動地驚天扑濕過！「啜核」打救死仔包 無賴鄭中基變種好老公

大滿貫！舊愛老友都撐！

早幾晚去睇鄭中基個騷，係咪咁好睇？Nuts哥成日都話，睇騷唔係齋睇有冇換衫或唱乜歌咁膚淺，而係要有Feel。個騷其中一幕係鄭中基同老竇Jam《浪子心聲》，好老實，呢幕你彈我唱真係睇到有啲眼濕濕！之後鄭中基個女Emma唱埋一份，又送「肉嘴」錫錫Daddy，唔係Nuts哥特別感性，「無賴」回頭成家立室有仔有女，最後企喺紅館贏得萬人鼓掌，呢個故事幾咁勵志呀！

個騷唔只親情滿瀉，仲係友情歲月，唔只搵到天后陳慧琳做嘉賓，連男神黃子華都嚟玩番Part棟篤笑，而且明知唱到走音都肯開金口！最爆嘅係，喺老婆余思敏面前夠膽話自己唔只楊千嬅同蔡卓妍（阿Sa）兩個舊愛嘅鄭中基，竟然請到千嬅世紀合唱！好老實，呢個騷唔係一個演唱會咁簡單，而係鄭中基嘅人生成績表，話畀大家聽今時今日嘅鄭中基，無論家庭同友情都係大滿貫！

其實畀着你係後生仔，屋企有錢兼有貴人扶持、夢想做歌手又天生有把靚聲，家底事業唾手可得，講真十個有十個都囂啦！之後鄭中基畀人話得罪人多稱呼人少，愛煙愛酒又愛蒲，最出位就係2000年喺飛機上醉酒鬧事，出位到畀FBI「叉廚」，告得入嘅話監都有得坐呀！

浪子心聲！有小朋友先有型！

事業愛情就好似一鍋粥咁，路係自己揀，仆低唔好喊，想當日佢同阿Sa開記者會，喊晒口承認結過婚又離埋婚，可想而知佢幾後悔錯失呢段感情！其實做人嘅嘢好簡單，錯就要認、打就要企定，條路行錯咗唔緊要，識諗計返轉頭，往往就海闊天空。鄭中基話你知，你話我衰我賤面目可憎，我就去到盡賤畀你睇，就係呢份爭氣，將嗰份無賴本色發揮喺電影度，你睇佢喺《行運超人》做「斷蟹」，一口潮州腔做風水佬，搞到影帝梁朝偉都爭啲招架不住，仲裝胸趷籮扮女人，連「如花」都要甘拜下風！之後《龍咁威》嘅龍威同埋《我要做Model》嘅Mandom等等，勁啜核笑死冇命賠！雖然當時唔少人都話鄭中基嘅表情誇張唧笑度高，但佢搞笑得嚟又堅有戲，睇佢憑《低俗喜劇》「暴龍哥」一角，點只牛歡喜，簡直係皆大歡喜啦！勁到擸晒金馬獎同金像獎嘅最佳男配角，話畀全世界知鄭中基已經正式返咗嚟！

鄭中基喺演唱會度話：「我向來都係浪子，冇諗過會生小朋友，但依家覺得有小朋友先有型。」鄭中基依家最想嘅，就係早啲開工早啲收工返屋企陪仔女。呢個堅係浪子心聲，唔係一個冇經歷嘅男人可以講得出口。計我話，鄭中基當晚唱：「人若然忘記了愛，忙着和時間比賽…… 」嗰陣都好有型，唔係因為佢係「斷蟹」或「暴龍哥」，係佢經歷幾多嘢都好，始終如一係識唱歌、唱到你毛管戙嘅鄭中基！