馮盈盈行運中大獎 麥美恩做「雞」攞頭彩
港姐冠軍馮盈盈昨日在無綫賀年直播節目中，與現場觀眾齊齊抽中「足金金雞」，她笑言向來沒有抽獎運：「今次一次過用晒。」扮雞玩遊戲的麥美恩亦因瞓身演出而氹得高層哈哈笑，同樣在雞年正月初一攞頭彩！
藝人汪明荃、胡楓、港姐冠軍馮盈盈（Crystal）、麥美恩（Mayanne）及出爐華姐冠軍余思霆等昨日在將軍澳電視廣播城，為無綫賀年直播節目《雞年唱旺報新春》演出。Crystal與現場觀眾齊齊抽中「足金金雞」，甫踏入雞年便攞頭彩，勁好意頭。於新春「響頭炮」的她坦言向來沒有抽獎運：「所以今次就有個好開始！（趁勢買埋六合彩？）一次過用晒啲抽獎運，交番畀媽咪買啦！」至於在遊戲環節扮雞的Mayanne玩到趴地，連「衫」都爛埋，認真落力！她更自爆氹得高層哈哈笑：「管理層睇到我話好好笑，已經係任務完成。」
余思霆認拍拖
另外，早前有讀者向本報爆料，指朱智賢和謝東閔行花市，昨日兩人亦有出席活動，更齊聲否認拍拖，謝東閔更自稱單身，但不排除有發展機會：「大家近排都忙，或者有時間食吓嘢囉。」朱智賢亦指以事業為重，更解釋兩人當日何解戴上情侶帽：「好明顯佢跟我風！」
至於出爐華姐冠軍余思霆被踢爆與組合天堂鳥成員Tyrese拍拖，她甜笑點頭承認，更以普通話說：「是拍拖，拍了一、兩年，我們是在廣州工作認識。（鍾意佢係『翻版朴寶劍』？）我們認識時都是普通人，只是後來都做了藝人。」
文：影視組