鄭中基爆粗慈父 搵囡囡幫口

歌手鄭中基（Ronald）一連四場的《PLAY IT AGAIN世界巡迴演唱會》，前日年卅晚於紅館開鑼，為方便觀眾食團年飯，演唱會延遲至約九時半開騷，除了獲太太余思敏及兩名子女捧場外，亦獲田蕊妮、蘇志威、林敏驄及女伴等捧場，全場爆滿。開騷前現場播出「暴龍哥」腔的聲帶，「爆粗」提大家不要拍片、睇得開心及記得畀利是等溫馨提示，但句句都有嘟嘟聲，扮嘟走粗口，十分搞笑！

「升降」杜汶澤放笑彈

全晚Ronald邀請了幾位嘉賓，分別是父親鄭東漢、薛凱琪、杜汶澤及樂隊LMF，其中阿澤表演時大放笑彈，當音樂響起他想開口唱時，卻被降下台，而Ronald就升上台，令全場大笑，連Ronald都忍不住笑到甩嘴。除搞笑外，演唱會亦有溫情元素，Ronald坦言8歲已識飲酒，因而養成任性的性格：「任性令我撞咗好多板，失去朋友、形象、工作，好多好朋友突然唔見晒，令我知道邊啲先係真正朋友。」接着他在台上多謝太太，並問台下的囡囡想不想唱歌，囡囡點頭話好，於是Ronald就落台遞咪給囡囡唱出賀年歌，場面溫馨。獻唱《無賴》前，他表示很多很久不見的朋友、反面兄弟，甚至前度女友都有問他攞演唱會飛，但他感謝所有愛他或愛過他的人。

Ronald遞咪給囡囡唱賀年歌。	余思敏、囡囡	Ronald自知演唱會飛一票難求，大讚搶到飛的觀眾勁。

年卅晚限定派利是

期間Ronald又講到農曆新年能在紅館開騷很難得，自爆之前曾有期，但被校長譚詠麟多次阻撓：「有一年佢打畀我叫我讓期，我冇托手(月爭)，點知第二年嚟多個李克勤，兩把口加埋好難推，過多一年仲勁，係溫拿五個，加埋二百幾歲，我於心何忍！點知嚟到今年仲勁，係溫拿加太極，我真係冇辦法唔出撒手(月爭)，我band leader係太極其中一個成員，佢哋同校長講，亞洲博覽係好嘢，好多外國歌手都喺嗰度開騷，係西人，喺個度開就可以衝出國際，於是校長二話不說就標咗去亞博開騷！」點唱環節後，Ronald與大家倒數踏入年初一，邊唱《喜氣洋洋》邊派利是給觀眾，據知他共派了一百封內有朱古力金幣的利是，並只限年卅晚派發。最後Ronald衷心感謝各位：「因為你哋我先開騷，希望下次唔使再等十年同大家唱歌！」並以《天意》作結個唱。

文：音樂組

攝：劉智源