李曼筠雞手鴨腳煮大餐

曾主持飲食節目的李曼筠每年都會炮製新春大餐，日前她親自去街市買料，落手揀生猛海鮮、蔬菜及生果，更到雞檔揀雞，Maggie細心地聽檔主教如何揀新鮮雞，更毫無懼色拎起肥雞拍照。有養寵物的Maggie馴服動物果然有一手，繼往年成功氹蟒蛇氹馬匹，今次拎雞上手，肥雞都聽聽話話，老闆娘也稱讚她夠大膽又叻女。

紅底催運

Maggie表示愈大愈喜歡下廚，經常與媽咪研究賀年大餐。講到新年習俗，Maggie堅持要年廿八洗邋遢，新正頭穿紅色內衣褲，及會給她的幾隻貓咪壓歲錢：「親友嚟我屋企拜年，都會畀利是我啲貓，我會幫貓咪儲起，第時用嚟買貓糧同睇醫生。」易肥易瘦的Maggie笑言由中秋開始就是儲肥日子，新春佳節更要「過肥年」，一於懶理減肥，她笑說：「我冇刻意節食，寧願做更多運動，冇話肥定瘦靚，最緊要均勻同開心，過量節食有時令自己抑鬱。」

李曼筠獲檔主細心教導揀新鮮雞。	新正頭當然要揀番啲生猛海蝦，食完唔怕畀人蝦。	錫錫都肯 堅勇敢 李曼筠不但唔怕拎雞上手，更大膽錫錫。

轉搞生意

講到雞年願望，Maggie希望可兼顧主持及拍戲，亦想做幕後及跟演藝事業無關的工作：「開始有啲方向。（搞生意？）類似，但未公開得住，生肖運程話我今年事業順利，係行動年，做咗係有回報，所以要更努力！（感情方面呢？）安排咗咁多工作，希望今年繼續唔拍拖，唔好無啦啦走個拍拖嘅人出嚟呀！」

文：影視組