建東雞街市辦年貨

藝人黃建東(Derek)去年憑惡搞《PPAP》成為網絡紅人,人氣一時無兩!肖雞的他趁住歲晚,化身一隻「雞」到街市辦年貨,沿途被不少街坊認出,爭相跟這隻「建東雞」合照,他亦有求必應,表現生猛!

黃建東去年人氣急升,奠定搞笑形象,肖雞的他趁住歲晚化身「建東雞」亂入街市辦年貨,買豬肉蔬菜,親自煮團年飯孝敬父母,Derek說:「細個年三十晚會同親戚去婆婆屋企食飯,年初一拜年,初二就成班小朋友賭錢,玩好細,兩毫子咁,全年唯一一日可以賭錢。(着紅色底褲旺一旺?)我要踢爆屋企人,我媽咪、爸爸都有着!」

發放正能量

2016年成績突飛猛進,令Derek對演藝事業存有更大希望:「希望今年拍更多劇及節目,度到多啲搞笑嘢,發放多啲正能量。媽咪見到個仔見報好開心,會叫大家買報紙,但係咁叫我減肥囉。」他笑言想練大隻,想擁有余文樂和張家輝的身形!

暗戀女同事

之後Derek換上唐裝到摩羅街尋古物,被不少街坊認出要求合照,他亦來者不拒,當中不乏青春少艾,問他恨不恨拍拖?單身兩年的他即自爆試過暗戀公司女同事:「我啲女同事樣靚、眼角高,個個一收工就趕住出去,唔知係咪約咗男朋友,所以都係開工食飯傾吓偈。」他認為只要事業有成,不怕沒有桃花,並憶起初入行時的拍拖經歷,前度嫌見面太少,備受冷落,最後分手收場:「自己收工後壓力大,耐性唔好,佢散咗先講,冇得補救,依家會提自己幾大壓力都好,要錫女友多啲。」

鳴謝:K.H. WorkHouse@Tai Ping Shan Street Gallery

化妝:Alfred@Seven sense

服裝:Man Chan女王、Palladium

文:李惠儀

攝:李柏儒