李弘基唱到出血 港迷high爆掟錘

韓國男團FT Island前晚在亞博開騷，相隔一年再來港，先以一曲《Out Of Love》揭開序幕。大唱四首歌後，五子以廣東話打招呼，李弘基提到近日有不少帥氣歌手來港開騷，多謝大家仍來支持他們。崔鍾勛笑問他是否想看同日在港開騷的Big Bang？李弘基笑言想看美國殿堂級重金屬樂隊Metallica。

禁粉絲拍照

李弘基又指不少粉絲睇騷時只顧拍照，望大家可以放下相機，一起跳舞癲番晚，崔鍾勛隨即以普通話叫大家「不要拍照」，十分搞笑！其後五子又狂晒廣東話，宋承炫說：「女神們你哋好嗎？又靚咗喎！」而李在真則問粉絲：「我哋有冇靚仔咗？」現場氣氛熱烈！

宋承炫	李弘基騷後自爆激動到喉嚨出血。

十周年驚喜

FT Island今年踏入10周年，李弘基指特別準備了第一張專輯歌曲，而全場粉絲亦準備了驚喜，一同以沙錘打拍子，令FT Island非常感動。李弘基更不禁拿出手機拍下這個場面，他其後問粉絲拿着甚麼，不少粉絲即將沙錘拋上台，嚇得他大叫「Stop」！其後李弘基表示準備了傷心的情歌，不過笑言自己最近其實不太傷心，看來他與女友韓寶凜的感情生活十分甜蜜。

在騷上High爆的李弘基，騷後在Instagram自爆激動到喉嚨出血：「多謝大家畀驚喜我，冇想到你哋會帶樂器嚟，我好耐冇試過喉嚨出血，但真係好幸福！」他更指粉絲給了他很大力量，望與粉絲成為永遠的朋友。

文：外娛組