G.E.M.憶舊情 有愛才有痛

甚少在香港娛樂圈「蒲頭」，最近因一套自傳式紀錄片《一路逆風》，G.E.M.猶如真人騷，道出過去幾年所經歷過的美好與傷痛。紀錄片中G.E.M.回憶到上段感情，雖然她沒有指名道姓，但與台灣歌手林宥嘉的三年情最惹人談論。面對鏡頭大談感情事，G.E.M.並不覺得難開口：「我冇乜嘢唔可以畀人知。」她承認是個戀愛大過天的女孩，很容易受感情影響而不開心：「我真係已經成長咗，以前同男友一嘈交，你嗰日就唔使做嘢，一做嘢個人就好似遊魂咁，好易影響到我情緒。」一直有指她被上段感情傷得好深，她說：「又唔係叫做大傷害，一段關係有開心有唔開心，可能嗰個感情經歷咗好多好開心嘅事，當佢成為咗過去，你先會為咗佢而傷心。」

怕壓力改玩地下情

今天G.E.M.已將這段感情放低，有指這段情是男方辜負了她？她說：「其實人哋點睇真係唔太緊要，如果你早兩、三年問我呢個問題，可能我會有個比較情緒化嘅答案，但今日再望番轉頭，唔係覺得非黑即白嘅一個答案囉。」G.E.M.笑言上段感情讓她學識，要盡量低調處理感情事：「到我結婚時先會講。」因為外來的壓力確實會影響到兩人的感情：「有時唔係你處唔處理到呢個壓力，係你處理嘅過程用咗好多能量，原本呢啲能量可以鞏固個關係，但依家只能令到關係惡化啫，如果可以省卻咗你呢啲壓力來源，兩個人就可以輕鬆得多。」

G.E.M.面對各種負評，早已習以為常，認為只要做番自己就ok。	25歲的G.E.M.對婚姻仍然憧憬。	G.E.M.的紀錄片拍攝了足足兩年。

信命中注定的緣分

25歲的G.E.M.在經理人眼中對愛情好「童話」，她笑言不怕被人取笑，仲會繼續憧憬下去：「我真係覺得冥冥中有主宰，係有命中注定嘅關係，你唔需要刻意去搵，當你預備好自己嘅時候，嗰個人就會出現。」曾經講過希望25歲結婚的她，笑言如今要延遲兩年，問到她咁有信心嫁得出？她笑說：「我想啫！」外表自信爆棚的G.E.M.卻自嘲現實生活中是怕醜女一名，要她在鏡頭前演談情說愛，她恐怕演不了：「試過好耐冇見男友，再見到佢嗰吓，我係唔夠膽望佢囉，要搵第二啲嘢做，其實個心諗：『死啦，陣間點呢？』其實佢係你男友係好熟，你唔使尷尬㗎？（次次拍拖都係咁？）好早嘅學生時代，好難好耐唔見。」這句話已呼之欲出她口中的「男友」是誰！

G.E.M.自言現實中是名怕醜女。

G.E.M.的招牌「金魚嘴」原來是初戀男友「溝女」的秘技。

靠「金魚嘴」識朋友

今次G.E.M.的紀錄片攝製了兩年，她自爆有鏡頭恐懼症，總覺得面對鏡頭很尷尬。15歲時入行，經理人更買了部攝影機給她，要她學習面對鏡頭，但並不成功，後來經理人提議她在鏡頭前做她的招牌「金魚嘴」，亦成就了她在網上第一條熱爆片，讓粉絲認識她。她自揭「金魚嘴」的秘密：「我成日認識新朋友都唔知講咩好，好驚唔講嘢嘅氣氛，所以見親人就教佢哋整金魚嘴打開話題。」原來「金魚嘴」是她的初戀男友「溝女」招數，G.E.M.笑說：「我同佢係參加歌唱比賽認識，當時有20個參賽者，佢就係用呢招令我記得佢。」

冇寸嘴否認耍大牌

在輿論戰中面對各種負面抨擊聲音，G.E.M.坦言曾經好介意，試過將微博刪除，在家中哭完再哭，她說：「我有檢討過，你話完全冇感覺係唔會，能夠解決嘅梗係努力去解決。」她否認囂張、耍大牌，她說：「你真係問我呢個問題，我真係問心無愧咁答你，我真係冇。」早在13歲時，她在學校參加歌唱比賽成為風頭躉，已經承受過隔籬班同學的輿論：「我已經成日檢討，係咪我做咗啲咩嘢，搞到你覺得我好寸呀，未做歌手我已時刻警惕自己要小心，喺成長過程中我學識，有啲莫須有就唔理，如果一啲問題避免到，你梗係盡力咁去避免。」

Stylist：Emma Wallace

Makeup：Dora Chan assisted by Phoebe Ho (Spotlight Image）

Hair：Freddy Chiu

Venue：紅磡都會海逸

文：音樂組　

攝：劉智源