Tommy憶亡母認衰仔 喊住嗌改過
打不死的組合E-Kids前晚相隔多年合體開騷，三子施展渾身解數，期間阮民安（Tommy）自彈自唱懷念亡母，並喊住稱會努力改過！
「MK組合」E-Kids相隔多年前晚合體在旺角麥花臣場館舉行演唱會，獲林盛斌（Bob）送上花籃，裕美、鄭世豪等到場支持。雖然撞正韓國天團Big Bang同日開騷，但三子仍有很多歌迷捧場。現場有不少紀念品售賣，包括Cap帽、T恤等，其中Cap帽的售價是239元，竟然比Big Bang只售100元的舊款Cap帽貴一倍多，但仍有歌迷讚價錢合理。
三位成員阮民安、林詠倫（Alan）及郁禮賢（Tim）分別以金、灰、紅髮現身，施展渾身解數邊跳邊唱多首快歌，令歌迷high爆。期間亦抽Big Bang水，先寸那邊要排隊入場睇騷，之後Alan獨唱時就唱了幾句Big Bang成員太陽的《Eyes, Nose, Lips》。而「樂壇小強」Tommy幾年前曾抄Big Bang隊長G-Dragon出歌，把對方的《Crayon》改成《踩唔死我》，前晚他都有唱此曲。
「我會乖㗎啦」
Tommy獨唱《差一點我們會飛》時，螢幕播出佔領運動的片段，接着他自彈自唱《錯愛》，螢幕播出其亡母的相片，他哽咽說：「多謝大家嚟睇我哋重組演唱會！」接着重提當年因醉駕及嗜賭欠債而自毀前程：「2006年，人生上出現咗好大嘅錯誤，令到好多喜歡我、唔認識我嘅人對我有呢個標籤，相信除咗我最難受之外，就係我爸爸媽媽。2016年7月，媽咪因為生Cancer離開咗，我知道佢離開嘅時候，仲係好擔心我呢個衰仔，從今我會努力做好自己，即使媽咪唔喺度，但我相信佢都係會好開心嘅，我會乖(口架)啦！」
Tim將為人父
隨後Tim獨唱周杰倫的《蝸牛》，螢幕播出他與老婆的結婚相，並寫住「我們結婚了，還有，將會做爸爸」，獲全場歡呼！尾聲時三子在台上講感受，Tim表示他們為演唱會做足100分，這幾天睡了不足10小時，Alan則自嘲：「你瞓咗10個鐘，我喺屋企瞓咗幾年都冇嘢做。」最後三子以《初哥》作結。
完騷後，他們表示很難搵贊助商：「我哋唔只係奀星，仲係濕星，多謝好多單位肯借衫畀我哋，其實我哋今次冇收歌酬，全部推晒落去做製作。」並表示希望之後在更大場地開騷。Tim則透露太太已懷孕四、五個月，而問到Tommy未婚妻張倚雯（Eva）是否已懷孕35周？他扮懵說：「唔知喎，我要Check吓，如果有好消息會話畀大家聽。」
文：音樂組