大肚吳若希有Luck贏馬加餸
歌手吳若希（Jinny）現懷有五個月身孕，自從佗了BB女後，Jinny已搬到澳門居住，方便男友Alex Ho及未來奶奶照顧，不過近日Jinny返港，前日跟老友許廷鏗食飯，昨日又孖男友Alex現身沙田馬場，曾揚言準備做馬主的她，看來是入場「學嘢」。
只見Jinny睇跑馬時十分投入，雖然粗身大細，但成個大細路般，睇到跳吓跳吓又狂笑，跳脫非常，反而教旁人擔心。Jinny說：「我第一次入馬場，當然要落注試吓手氣。」大肚婆的確有運，投注第八場3號「幸運年年」的她果然贏馬，事後她接受電話訪問時說：「我買咗五十蚊位置，攞番三百幾蚊，預咗一千蚊出嚟玩，買咗三場，兩場贏一場輸，除咗成本，贏百零蚊，用嚟食飯加多味餸囉！」同時現身馬場的還有馬德鐘夫婦。
