志偉驚賊仔 唔敢攞Cash
藝人曾志偉昨日到九龍城出席「長者盆菜宴」，焦點落在上月以2千元投注賽馬，勁贏1千6百萬的志偉身上。志偉被問到投注心得，他說：「我都話：『行運財神，純粹好運！』、『唔賭唔知時運到』，我一百元一條飛，大家可以縮到變十元買，都可以中百幾萬！呢個月我不停笑，報紙都分析我點樣中，我開心同感恩。（點解咁買？點樣度㗎？）冇得度，有得度阿叻（陳百祥）中咗好耐，佢日日睇晨操！不過佢累積可能贏得多過我，我一次過咁好彩啫！」
搬新屋旺發財？
問到如何使用彩金？他說：「善事我不斷有做，我唔覺得中咗要特別做多啲。（買乜獎勵自己？）我都唔記得有冇買，冇所謂，日日慶祝緊，醉咗好多晚。（請得晒所有朋友食飯？）仲未，我諗要跨年，有啲話要環遊世界，我點得閒？（忙數銀紙？）都未見過啲錢，啲錢未攞住，啲人問點解唔攞Cash，我要嚟引賊仔呀？但都有影低張支票。」他直言女兒對他贏1600萬感到很罕有，忍不住打給他，問他中獎反應，他說：「我唔夠幾分鐘醉咗！」
剛搬新屋的他被問是否大埔新居旺他發大財，他說：「風水我唔係唔信，但你個人行運就有風水，最緊要做好事、平常心、心地好！（買樓前睇晒風水？）我習慣買咗先，鍾意咪買，吓吓夾風水，好耐都買唔到樓。」