張詠恩拒再呃飯食 闖「關」做老闆

冇天分提早閃

一講到張詠恩（Jan）這個名字，大家可能會想起是張致恒的姊姊，或是DJ Donald（唐劍康）的老婆，但大家可記得她曾是女子組合Krusty的一員？回想當初加入娛樂圈的原因，Jan坦言是抱着「咩都試吓」的心態，半推半就下成為歌手，不過短短幾年時間並不享受：「我唔會好Enjoy呢件事，因為我覺得自己冇咁嘅Talent去做，衰啲講，我覺得自己好似呃飯食咁樣！同埋做Artist好被動，所有嘢係由公司決定，我鍾意做啲我主動性去決定嘅嘢。」

目光較長遠的Jan當時已想像到5年後的自己會在這行浮浮沉沉，不會有更好的發展，遂萌生退出的念頭：「可能有嘢就做，冇嘢就唔知做咩咁，一諗到就覺得好可悲，好浪費時間。」她於2008年與唱片公司Silly Thing和平解約，更獲公司介紹到時裝品牌做公關：「我其實都鍾意啲對人嘅工作，想做PR、Marketing嘅嘢，我當時嘅經理人就介紹我畀2%嘅老細，我哋之前都有幫2%拍廣告，所以都識，個老細就叫我嚟試，一做就7年，呢7年裏面由所有嘢唔識，慢慢去學同去累積。」

張詠恩成功做女強人，創立公關公司做老闆。	張詠恩無悔當年與活己嵐（左）組Krusty闖樂壇。	張詠恩有最強勁的後盾，老公Donald無限量支持。

享受由零變有

公關主要負責對外工作，亦成為「關公災難」的關鍵人物，縱然Jan已在這行打滾8年，但她認為公關這門學問絕對學一世都學不完：「你一起身對住阿媽同樓下看更，都係一個公關嘅課程嚟，公關要轉數好快，留意每一樣嘢發生，我同你講緊嘢，但我已經係要留意緊後面嘅人係點，或者成個環境係發生緊咩事。而公關危機呢樣嘢，其實最主要係你第一時間要出嚟解決，時間要把握得最好。」即使做公關再辛苦，Jan依然非常享受，她表示最大的滿足感源自將一個項目由零變到有：「因為每接一個project，係要由零幫人哋諗到件事真係發生咗，仲幫佢由零擴大到幾百percent，有好多人去鍾意、去buy。雖然我收咗錢做啫，但我都算係幫到人一部分囉！」

張詠恩享受做公關由零變有的過程。	張詠恩與好友Erica合資創業。	翹埋手唔使做？張詠恩卻堅持闖一番事業。

女人仔搞公司

在2015年4月，Jan要同時負責管理中、港、台三地市場，令她壓力大到爆煲，皮膚變差兼爛面，她選擇離開。老公Donald支持其決定，更曾勸她不如翹埋雙手唔好做，惟Jan始終想擁有自己的事業：「佢直情想叫我唔好做，佢話咁辛苦做咩啫，但我又覺得女人需要有自己嘅事業，唔通我日日喺屋企睇電視，唔知做咩，我又唔鍾意咁，我係好享受做嘢嘅人，犯賤囉！」

成立公關公司一直是Jan的夢想，這時正好是自立門戶的機會，她與好友Erica Lau成立anotherDAY Communication&Production公司：「我係同另一個朋友成立，其實唔需要投資好多，最主要係有office，公司要有cash flow咁，暫時都係6位數啫，係細公司，慢慢去做起囉！」

無悔做過藝人

Jan的公關公司成立只有一年多，她坦言未敢定下太大目標：「暫時唔想畀咁大壓力自己，唔想定一個好大嘅目標，或者好硬性嘅規定，當然我嘅目標係每一年嘅收入有增長，但我唔想一下子定個target太高，我成日覺得生活好緊要，要有生活同休息時間。」問她可有留戀娛樂圈水銀燈下的生活？Jan非常堅定地答：「冇呀！」但她從沒後悔曾成為藝人，反而要感激這段經歷令她遇上人生中的伯樂麥浚翹（大寶）：「當年入Silly Thing我係咩都唔識嘅(口靚)妹，日日過得好開心咪得，做住先，冇諗過想去邊度發展，呢個係好多年輕人遇到嘅問題，佢會教我好多嘢，好多fashion嘅嘢，諗嘢同講嘢技巧。」

文：音樂組

攝：劉斌

場地：Simply Italian Restaurant