小齊「手語」問診揸車變行房
藝人任賢齊（小齊）早前參加電單車越野賽拉傷腰部，應診時與法國醫生言語不通，小齊手口並用詢問能否揸電單車，醫生卻誤以為他指性生活，更做出不能的動作，惹笑非常。近日奪「最佳男演員」的林家棟被問會否加片酬時，他笑言：「有咩所謂！」
任賢齊、林家棟、杜琪峯等昨日出席電影《樹大招風》祝捷會，小齊早前於南美洲參加電單車越野賽受傷而回，他透露賽道共12,000公里，但由於天氣關係，加上電單車衝入樹林要由直升機救出，故最後只能完成11,000公里。
開心入圍最佳男主角
小齊坦言今次算是最辛苦的賽事：「天氣變化太大，真係唔甘心。前10名參賽者，有一半都係斷手斷腳，我算係完整，照完X-Ray之後瞓咗喺床，見後來入嚟啲人好嚴重，又斷大腿骨咁，我即刻起身讓床。（下次仲參加？）下次比汽車，起碼有鐵包住。」更指賽事中拉傷腰部，現時起身不可以太快，亦不可以拿重物件，問到是否真的不能行房？他笑說：「我唔明法國醫生講咩，做手勢問佢係咪唔可以揸電單車，佢誤會咗，就做咗唔可以行房動作出嚟。」談到入圍亞洲電影大獎的「最佳男主角」，小齊表示開心，坦言入圍已感高興。
加片酬？家棟：有咩所謂
而憑該片獲得香港電影評論學會大獎「最佳男演員」的家棟表示，沒有白費30年來食白果階段，問到會否加片酬，他笑言：「老闆出心啦！有咩所謂！」他指現時忙拍攝賀歲驚慄片，戲中演盜墓者要掘墳開棺，故已收足開工利是。
文：影視組