張繼聰幸福宣言冧Kay老爺親下廚
藝人張繼聰與謝安琪（Kay）昨日結婚十周年，阿聰先後在網上及出席活動時連環冧妻，自認超幸福，承諾會繼續搞笑氹老婆。不過因阿聰昨晚要工作未能慶祝，Kay直言不介意，而且會由老爺下廚拉埋鄰居在家食飯。
張繼聰、謝安琪結婚十周年，由不被外間看好，到成為圈中模範夫妻，育有八歲多兒子張瞻，最近Kay再有身孕在家中休養待產，家庭幸福美滿。
幸福圓滿繼續搞笑
昨日踏入凌晨時分，阿聰在社交網站發表「愛的宣言」，並晒出當年的婚照放閃，冧爆說：「感謝你成為我的妻子及最好的朋友，晃眼十年，因為有你同行，就算走過高山低谷，我都覺得沿途風光明媚。能夠有如此靈魂伴侶，讓這趟地球之旅變得幸福圓滿，放心，我會繼續喺我哋嘅婚姻生活裏面搞笑，令你繼續成為快樂的太太，Happy 10th anniversary， I love you honey！」Kay則上載另一張婚照，搞笑說：「會不會呢張靚啲呢？」
阿聰昨日出席賀歲電影《小男人週記3之吾家有喜》宣傳活動，提到老婆冧爆，問到十周年慶祝活動，他原本打算食飯、浪漫一下：「但夜晚要工作，公司都有問使唔使推咗工作，老婆話唔緊要，之後先慶祝。（賺錢先？）好實際，我話不如呢晚做嘢啲錢畀你，佢話OK！其實儀式唔重要，佢依家個肚好大，等佢話事。」最後他再次多謝老婆：「呢十年我好幸福，好多謝老婆平時搞搞笑笑，你好偉大！就嚟又幫我生多個小朋友，我會繼續努力氹佢開心！」
內心快樂別無所求
而Kay接受電話訪問時亦表示沒有特別慶祝活動，會如常在家跟家人吃飯：「我冇買禮物畀佢，都叫佢唔使買，心裏面開心就夠，冇咩特別要求。」她笑言會由已退休的老爺負責下廚：「通常啲節日由佢大顯身手，老爺仲請咗一兩位好Friend嘅鄰居嚟，有位鄰居同阿聰一樣前幾日生日，搵埋佢一齊開心吓囉！」
文：影視組