莊思明婚後盡情生B

藝人莊思明昨日穿旗袍出席香港貿易發展局舉辦的第48屆時裝節秋冬系列「時尚品牌匯演」,早前被拍得與男友楊明到醫院的她否認懷孕:「梗係唔係,嗰日我仲有染髮同着高跟鞋。第一次去醫院係我唔舒服,第二次係陪家人覆診。(你係咪有咗?)唔係,呢啲冇得呃。」不過她認為未婚懷孕並非大事:「當然最好係結婚先,未婚生仔明顯係意外,對我嚟講有計劃好啲。我鍾意有仔有女,結咗婚好啲,可以盡情咁生。(好似陳豪咁?)最好。(計劃結婚未?)暫時唔會咁快,唔會係今年嘅事。等男友諗吓先,畀個驚喜我。我年紀都唔細。」

另外,是次時裝騷展出印尼設計師Ika Butoni及中藝天工閣的作品,兩者均採用豐富印花,極具視覺效果。