嘉穎回味澳門第一次 喺警局瞓回魂覺

鄭嘉穎

鄭嘉穎與導演陳果日前在澳門拍攝新片，因事前未有向澳門司警當局申請便進入保安部隊事務局大樓拍攝，結果被帶返治安警察局助查，期間陳果承擔責任簽下道歉聲明，嘉穎被扣查約8小時後獲釋，並輕鬆指警局的咖喱雞飯好食。

昨日二人在港開工，到何文田區拍攝外景，電影公司老闆黃百鳴、監製莊澄及錢小蕙都有到場。陳果表示之後會繼續到澳門申請拍攝，尚餘一日外景及一日室內戲，亦有部分會到賭場內拍攝：「以後都要申請，當局好嚴肅。（影響進度？）冇，已經來回過幾次，主要係度演員啲期。（保安大樓內拍咗嘅片要刪除？）正常嘅，有部分唔合規格。（刪晒整日嘅片？）係就死得喇，一、兩個鏡頭啫！（仲使唔使返差館報到？）唔使，已經搞掂晒，警方都話圓滿結束。」但問到之後會否小心啲，陳果似乎未知驚：「好難嘅，就算香港都好，導演天生取向，見到靚嘅嘢好難唔拍，偶爾會踩過界。全世界導演都係咁，盡量避免啦！」在旁的錢小蕙即補充：「但我哋都會申請！」陳果亦說：「咁一定要申請啦！」

黃百鳴（左）探嘉穎班兼打氣。

陳果表示拍攝起上嚟，分分鐘會再踩界。

導演陳果自認惹火

問嘉穎在警局時有否擔心？他笑說：「冇咩好擔心，差人知我哋拍通頂，知我眼瞓，仲畀張梳化床我瞓咗個回魂覺，個幾鐘。（第一次遇到咁嘅事？）係呀！多謝陳導演畀啲咁好嘅經歷我！」陳果則笑言自己並非第一次：「我好惹火，唔知點解，之前喺香港都畀人(豆)過！」再問嘉穎，女友陳凱琳會否擔心？他Man爆地說：「冇，通知咗佢，解決咗件事就得！（佢點呵番你？）唔講呢啲！最緊要之後拍攝順利！（使唔使返去再拍？）要呀！（驚咗？）有咩好驚？」

文：影視組