朱晨麗變豬頭被迫停廠

藝人朱晨麗(朱朱)於無綫劇集化身古裝美女,朱朱自爆拍攝首日即出師不利「中頭獎」,畀惡蚊叮腫額頭而被迫停廠!她說:「發作得好快,成半個額頭都腫晒!」其後她又直認與拍檔黃子恆於劇內談情「有難度」。

在無綫劇集《味想天開》中扮演古裝美女的朱晨麗,提到拍攝點滴時,即自爆拍攝首日就出師不利「中頭獎」,不慎畀惡蚊叮至額頭腫起一大片,令「睇唔過眼」的導演下令停廠一日!慘被叮腫靚樣的朱朱透露,當日連遠鏡拍攝亦見到其「傷勢」,認真慘慘豬:「夏天拍攝會好多蚊,我第一日拍就好唔順利,直頭拍唔到!因為我畀蚊叮到額頭,腫起咗好大舊,發作得好快,成半個額頭都腫晒!水鄉場景遠處有條橋,就算擺個鏡頭喺橋上拍Wide Shot過嚟,都仲見到我個額頭腫咗。」最後導演決定下次先拍。

與黃子恆感情多波折

該劇主要於電視城新搭建的水鄉場景取景,雖然朱朱在該處拍攝時慘遭惡蚊毒手,但她仍然大讚水鄉的寫意靚景:「水鄉影出嚟幾靚,全部都係實景。我哋仲有好多場要喺水鄉街上試食,好多村民演員就真係邊拍邊燒烤同打邊爐。」

朱朱在劇中與黃子恆飾演一對多番離合的情侶,她直認與子恆談情「有難度」:「我角色好正義,會幫人醫病,子恆喺劇入面吸食毒物而走火入魔,係我令佢回心轉意。大家感情上好多波折,分開又一齊又分開,感情起伏位比較難少少去拿捏!因為我哋唔可以每次分手都一樣,要諗吓點樣令場面更有層次感。」

化妝:Raymond Yip

髮型:Steve Shek@HAiR

文:影視組