唐詩詠初戀竟然似Bob？
藝員唐詩詠日前在新片破格飾演舞女及小三，形象斯文的她穿吊帶裙襯魚網絲襪火辣上陣，谷胸又晒腿！她獲拍檔林盛斌（Bob）激讚扮得神似，自己亦高呼演得過癮！片中癡戀Bob的詩詠大爆對方貌似其初戀男友：「Cut細啲塊面就會似，頭髮又多番啲，隻眼又大啲！」
「女神」唐詩詠、林盛斌（Bob）及麥玲玲合作拍新片《我要發達》，形象又Pure又True的詩詠透露片中首次破格演舞女及小三，更穿上吊帶緊身裙襯魚網絲襪示人，谷胸又晒腿，Bob激讚她扮得神似：「有一場講佢做舞小姐，你平時喺電視劇未見過佢着魚網絲襪搭Tube dress，（效果）真係好似妓女！佢楚楚可憐，我唔拯救佢都唔得！」詩詠亦笑言演得過癮：「第一次做呢種角色，幾好呀，我鍾意呀！（平時都着魚網絲襪？）梗係冇啦！我唔會揀嚟着！」在片中癡戀Bob的詩詠，竟笑指初戀情人與拍檔有幾分相似：「好多嘢都冇試過，例如我要癡戀Bob！（好難投入？）唔難，我發現佢似我初戀男友，Cut細啲佢塊面就似，仲有頭髮多番啲，隻眼又大啲！」
麥玲玲「萬歲」請食鮑魚
詩詠又笑言片中最性感的其實是飾演Bob老婆的麥玲玲：「我唔係最性感，玲玲姐全套戲都要着絲質睡衣！」麥玲玲笑言戲服全是睡衣，所以「拍到邊就瞓到邊」。Bob表示戲內與麥玲玲經常互窒，戲外則獲對方厚待：「佢『萬歲』請大家食花膠、海參同鮑魚，成百幾隻鮑魚，人人有份，仲可以返轉頭再食！」麥玲玲爆料指詩詠曾邀請男友洪永城探班食飽魚，可惜對方忙於工作：「有人好錫佢男朋友囉，見到鮑魚即刻打電話問『你過唔過嚟食呀？』關心個男朋友！」問到洪永城最後可有來探班？詩詠撒嬌說：「叫佢唔好搶我哋嘢食，唔招呼外人呀！」
唐詩詠服裝及化妝：Sinequanone、Jessic Chan
麥玲玲化妝：Khaki
場地：Studio King
文：影視組