周星馳果欄派西柚吳亦凡要保住籮柚

人氣偶像吳亦凡旋風式來港宣傳新戲，所到之處都有大批「忠粉」等候，昨日他與周星馳、徐克在果欄派西柚，大批粉絲聞風而至，活動未開始已逼爆果欄！有些粉絲為見偶像，竟罔顧安全企出馬路中心石壆，險象環生。工作人員多番呼籲小心安全，亦有警察到場了解。

擺情史上枱

受訪時，周星馳和徐克不時拿吳亦凡來開玩笑，兩人被問到拍戲期間誰「揸fit」多？周星馳即指「梗係吳總」啦！令吳亦凡一臉腼腆，之後司儀叫兩人評吳亦凡有沒有喜劇感？周星馳簡而清說了一句：「搞笑」！徐克則爆周星馳「靜雞雞」教吳亦凡：「拍戲期間，周星馳會拉吳亦凡走埋一邊，之後吳亦凡再埋位時就掂晒(口架)喇！」

吳亦凡的瘋狂粉絲企上馬路中心的石壆，險象環生。	吳亦凡前晚戴口罩抵港。	大班市民逼爆果欄，期間有警察到場了解。

提到今次合作，周星馳指說了廿幾、三十年，徐克笑言今次終於合作，其實好微妙。問怎微妙法？徐克搞笑話要用來寫《回憶錄》。至於今次電影的愛情線如何？周星馳直言：「好勁揪」，徐克則笑指周星馳把私人情史都放進去，所以他不好意思修改。

全女班接機

此外，吳亦凡前晚從內地抵港，吸引大批粉絲一早到場等候，現場所見幾乎是「清一色」全女班。她們一見吳亦凡現身，即大聲歡呼，吳亦凡亦相當識做，不但多次向兩旁粉絲揮手，臨上車更企定定揮手，又豎起拇指讚好，上車後又特意拉低車窗，伸手出窗與粉絲揮手道別，冧爆粉絲，她們亦大叫吳亦凡「早點休息」，不想偶像太操勞。

文：影視組