傅嘉莉處女床戰山聰扯晒蝦

傅嘉莉自言拍床戲Easy Job，相反對手陳山聰就搞到氣喘！

「視帝」陳展鵬、林夏薇、陳山聰、傅嘉莉與單立文等昨日到油塘宣傳新劇《乘勝狙擊》，其中以傅嘉莉透視「事業線」最性感！劇中與陳山聰有床戲的她透露是第一次拍床戲，獲單立文教授心得：「豹哥（單立文）教我放鬆啲，拍得放啲、一次過拍。（參考豹哥以前嘅作品？）冇！男女演繹唔同。（豹哥有冇同你排戲？）唔敢！但到真係同山聰拍嗰陣反而好輕鬆，山聰就拍到喘晒氣、口唇都白晒！原來冇想像中咁難，反而男仔難啲，就鏡頭又要小心唔好碰到敏感位置。」講到性感打扮，傅嘉莉笑言配合角色：「今次演富家女，所以着得優雅啲、型啲。（收視好就再性感啲？）等收視好展鵬請食飯先再着得隆重啲。」

「人妻」林夏薇在劇中同樣有不少激情戲，問到會否不讓老公睇劇？她竟說：「我會逼佢睇！佢話我好變態！之前有啲接吻戲，佢話做乜逼佢睇，我話梗係要睇我嘅戲o架！其實做嘢啫！」她認為劇集適合過年打麻雀團聚時一齊睇。

傅嘉莉指床戰前有單立文教路。	氣喘係劇情需要…啊…！（設計對白）	陳展鵬透露搵粉絲陪過生日，小心胡定欣呷醋啊！

展鵬生日等見定欣

至於14號生日的陳展鵬獲大會贈蛋糕預祝，粉絲還即席唱生日歌。他表示生日會與粉絲聚會慶祝，問到緋聞女友胡定欣可有相約？展鵬笑說：「我要開工拍《天命》，TVB等啦，見到就見。」提到《乘》劇在新年期間播出，展鵬坦言擔心收視受影響：「每年呢個時間都會，但套戲以賭做背景，都啱新年睇，希望頭一個星期收視有28點。」

文：影視組