蔡一智虎爸上身特「訓」調皮仔
蔡一智日前父兼母職，「一拖二」帶同仔女約友人歎茶。期間，活潑的囝囝竟然黐住玻璃玩，阿智見危險即「虎爸」上身，當眾發火出言訓話，聽話的囝囝最終肯乖乖坐定定。
現年52歲的草蜢成員蔡一智，2006年與太太周雪芳結為夫婦，婚後先後誕下一子一女，加埋繼女GiGi組成溫馨五口之家，經常結伴到處去。日前不用工作的阿智樂做湊仔公，一拖二帶一對子女現身中環，只見10歲女兒China皮膚白皙，面圓圓相當可愛，並且極有家姐風範，拖實紮紮跳的弟弟，三人邊行邊說笑。
挨實爸爸撒嬌
阿智先帶子女往餐廳會合友人茶敍，China乖巧地坐定定，相反4歲囝囝則明顯活潑得多，全程坐唔定！不肯主動進食之餘，又經常爬高爬低，不時挨實爸爸撒嬌。起初阿智萬般忍耐，細細聲叫他坐好。其後，囝囝好奇地黐住玻璃玩，為免發生意外，阿智終於「虎爸」上身，一臉嚴肅訓話。慘被爸爸當眾開火的囝囝雖然嘴扁扁，但聽教聽話的他最終肯坐好。
醫肚後，阿智帶子女會合老婆，兩個小朋友見到媽媽特別開心，一邊一個拖實媽媽。一家四口告別友人後，齊齊行街享天倫。另一日，阿智與太太撇下三名子女，出外拍拖過二人世界，坐在餐廳角落慢慢傾。
文、攝：追蹤組