林作折墮瞓街麥明詩話幾好

大律師林作上月到澳門拍攝宣傳旅遊點福隆新街的微電影《孤島傳說》，其敗家仔造型曝光，身為富家子、在英國牛津大學畢業、擁有倫敦法律學院法律文憑的他，除下西裝換上阿叔款白底衫、牛仔褲及白波鞋，加上一頭亂髮，感覺頹爆。戲中他飾演蛋卷店太子爺，為人貪慕虛榮、超hea又爛賭，賭錢輸到要問貨Van司機乞求廿蚊，又被飾演其妹的安采妮在眾人面前大鬧「賤人」。戲中他不但要踎街、瞓地，更要畀人打，由少爺仔淪落成地底泥。

演技有啲生硬

微電影拍攝四日，每日拍十多小時，但林作沒有受特別優待，跟工作人員一齊踎街食飯盒，但他反而有請大家飲汽水。除了造型外，大家都很關心其演技，小部分微電影片段曝光，只見自稱大學玩過Drama的林作表現有點生硬，有工作人員指他演技尚有進步空間，但亦有人讚他「折墮」得很入戲。

林作敗家仔造型曝光，穿上白底衫加亂髮，頹爆，又畀人打到跌落地！	嘩！乜你頹成咁！（設計對白）	林作

昨日林作接受電話訪問，講到在處男作中有很多犧牲，他說：「係假打。（要瞓街？）我本身好貼地，而且我冇潔癖，我踢波好勁，瞓街唔怕污糟。（喺街邊食飯盒？）我成日都喺街邊食飯盒，唔好講到律師高高在上，我冇架子，叻同架子係冇關係。」問到他做律師還是拍戲好玩？他稱人生如戲，打官司都是「表演」一種，又稱不會拍上癮：「你估吸毒咩！應該都冇人會再搵我拍戲，我咁嘅樣都冇人會搵我做靚仔。」講到跟他關係撲朔迷離的「十優港姐」冠軍麥明詩（Louisa）曾拍過電視劇及電影，問到可有請教對方？他稱不敢叫：「同佢有君子協定唔會講佢，我亦唔會叫佢睇。（介意同佢合作？）唔係，但佢唔會同我合作啦！」

有同舊愛傾過

不過，Louisa睇完微電影片段後讚林作表現幾好，還處處維護舊愛：「我作為新人，唔方便評論佢演技。（支持佢入行？）希望可以有人加入，發大影視圈。（佢問你意見？）大家都係學習。（佢有冇請教你？）知佢有拍嘢，大家都有略略傾過，但唔想講關於太多佢嘅嘢，同埋我都顧掂自己先，演戲有好多唔同方法，可能佢想做啲有喜劇感嘅嘢。」至於同戲演員陳達仁大讚林作有潛質，又沒有架子：「原來佢唔介意同我哋捱飯盒、消夜同講鹹濕嘢。」他又疑似暗寸跟林作傳緋聞的組合Bingo隊長Carman（關嘉敏）：「我拍完戲學到嘢，有人為林作可以冇對白、只係過鏡都肯嚟拍，原來係為咗之後嘅報道。」

另外，林作對於先與Carman傳緋聞，又被指追其他女仔，他說：「影到個朋友係舊朋友。（傳麥明詩同藥房太子爺Thomas拍拖？）個男仔係我識咗好耐嘅朋友，會約踢波。（你同麥明詩轉地下情？）佢啲嘢唔回應喇！」提到他勁冧Carman，問覺得對方是翻版周秀娜？他表示與Carman是朋友，更笑說：「佢靚過周秀娜。」而Carman對於林作的緋聞，她說：「覺得林作風趣。（佢好冧你？）佢冧唔同女仔，我只係其中一個。（話你似周秀娜？）係好事。（有冇機會發展？）冇諗。」

文：音樂組