陳展鵬晚晚扎醒如畀鬼壓

「三料視帝」陳展鵬、林夏薇、莊思敏、陳山聰等昨日為無綫新劇《乘勝狙擊》宣傳，近期在頒獎禮滿載而歸的展鵬，獎項接到手軟之餘，工作也開行turbo，劇接劇冇時停，昨日就以剃頭新look出現，表示將投入拍攝另一套劇集《天命》。

講盡滿漢蒙英語

雖然人氣旺盛，但展鵬有苦自己知，透露早前拍攝劇集《同盟》時缺乏休息時間，每日僅得個多小時睡覺，故幾個月來處於繃緊狀態，連睡覺也頻頻扎醒，儼如畀鬼壓，他說：「每日起身都會諗自己幾點通告，好驚遲到，係呢兩日好啲，未入新劇組可以瞓到自然醒。」談到《天》劇演歷史人物和珅，展鵬表示也會有動作場面，更會講蒙古、滿文、英文及廣東話四種語言，問到哪種語言最困難？他說：「我仲未練，但到時應該都係一句起兩句止，監製好好，暫時畀我一日拍兩場先。（有冇感情線？）唐詩詠、姚子羚同李施嬅都有，但古仔係男仔戲，唔太着重呢方面。」

光頭Look現身的陳展鵬扮坐無影櫈，林夏薇睇到笑哈哈。

眾演員齊齊為新劇宣傳。

林夏薇勤練甩牌

劇中演果欄雀后的薇薇，笑指現實生活對打麻雀零認識，問其老公可有研究？她說：「佢話自己好勁。（過兩招畀你？）拍嗰時佢有陪我練，佢話要同麻雀成為朋友，所以每朝起身練甩牌，隨身都會帶定兩隻牌甩。」對於首次擔正女一可感壓力？薇薇表示盡量不去想，認為已付出百分之二百演出已足夠。

文：影視組