邱美薇 蔡宛珊 揭娛圈秘聞
近年網絡發展一日千里，不少名人明星都愛在社交平台自我宣傳，藝人邱美薇（Mei Mei）及蔡宛珊（Sarika）亦加入網絡世界，開設清談直播節目「SM吹水台」，跟大家一同分享軼事。
問到何以有興趣「開咪」？她們說：「網上效用好大，呢個都係大勢所趨！咁啱我哋傾開，覺得大家以前入行嘅經歷或者見聞幾有趣，咁就諗不如試吓講吓啦！（做咗幾耐？）做咗個幾月，大概十一集，每集十五至二十分鐘左右，反應都幾好。（有冇趣事分享？）之前試過講過一個英文詞彙，跟住有網民同我哋拗咗好耐，有關英式定法式嘅分別，咁幾好呀，同大家又有互動，又有教育意義！」
節目內容廣泛，至於甚麼話題最受歡迎？原來是鮮為人知的秘聞，Sarika說：「我曾經分享過自己入行經歷，嗰陣入行畀人呃，真係要我畀錢去上堂。」Mei Mei則說：「我做過model公司，收過有啲女仔寄相嚟，裸照又收過，仲話咩都肯做，我哋分享出嚟，係想畀一啲有興趣入行嘅女仔知，唔係少布就得。」二人「開咪」不久，就有內地廣東電台要求轉播，她們希望能從中打開內地市場，開拓商機！
場地：Dragon-i
髮型：Bowie@Fifth Salon（Mei Mei）