強強婚後或留港定居 岑麗香唔使兩頭騰

榮升「強嫂」的岑麗香昨日拖實老公強強返抵香港,婚後首度露面的她透露將赴澳門工作,更是首次與強強一同迎接新一年。不少人都關心香香婚後會否香港、加拿大兩邊走,強強透露有計劃隨老婆來港發展,做個廿四孝老公!

無綫花旦岑麗香本月18日在加拿大與金融才俊強強(Joshua)結婚榮升「強嫂」,昨晨由溫哥華返抵香港,準備迎接婚後首個工作。香香與強強十指緊扣踏出機場入境大堂,香香小鳥依人,手上戴有由老公親自設計的巨型鑽戒,閃到爆!

香香拖實強強受訪,問到今次預計留港多久?她說:「耐o架!都要準備2月開劇,希望開工前去吓旅行,二人世界吓先!」強強則表示會留港數月。問到老公是否停工來港陪伴她?香香說:「唔係,佢都有自己嘢做。」不少人都關心香香婚後是否要加拿大及香港兩邊走,原來貼心的強強已計劃來港發展,他說:「呢度都可以開工嘅。(會唔會喺香港定居?)會諗住喺度呀!」

澳門倒數迎新年

香香新婚不久已回港工作,她大呻尚未有時間蜜月旅行:「好多海外親友嚟咗溫哥華同我哋慶祝,所以都要多啲陪佢哋!(幾時去度蜜月?)安排中。(去邊度蜜月?)真係未知,因為之前籌備婚禮好多嘢做,我都係1個月前先返嚟幫手,所以依家先開始諗。(幾時生BB?)未咁快,計劃返嚟做嘢先。(會唔會生BB?)將來囉,好多人問我哋,未有答案。」強強則笑說:「諗吓先,未有咁快手。」

問到已在溫哥華結婚擺酒,會否在港補擺喜酒?香香說:「仲諗緊,有啲屋企人冇過嚟溫哥華,所以會同屋企人食飯慶祝,但擺酒就未知。(請王君馨?)一定會請王君馨,見佢攞獎好感動,佢都好想過嚟!佢戥我哋開心,我哋都戥佢開心,互相恭喜,所以一定要一齊食飯!」香香享受新婚的甜蜜,笑言尚未習慣「強嫂」的身份,並透露除夕會到澳門出席倒數活動,將是首次與強強一起迎接新一年。

文:影視組