黃智雯佗B怒奔搗亂街市

藝人黃智雯(Mandy)、黃智賢(Ben)及C君(鄭詩君)昨日為拍新劇而玩轉街市,扮大肚的Mandy為追賊不惜跳梳化及推倒菜檔。雖然眾人於街市「搗亂檔」,但仍大受街坊歡迎。事後他們受訪時搞笑互窒,C君更自認廢柴:「我就表演『廢』,做番我自己!」

藝人黃智雯、黃智賢及C君昨日玩轉筲箕灣街市,拍攝無綫新劇《雜警奇兵》的追賊戲份。扮孕婦的Mandy挺「假肚」於鬧市來回狂跑兼跳梳化,而Ben更上演街頭捉魚而不慎跣親,表現賣力!Mandy於劇中為追捕由鄭健樂飾演的賊人,不惜推跌途人及推倒菜檔,獲Ben及C君大讚神勇,她笑言今次前來「搗亂檔」,怕惹街坊投訴。C君則笑指Ben及Mandy大受途人歡迎:「受歡迎到可能有街坊掟花畀佢哋。(你呢?)佢哋可能想掟花圈畀我!」

街坊狂恭喜

Mandy透露沿途獲不少途人恭喜「佗B」及叮囑大肚不宜亂跑,令她哭笑不得:「個個都走嚟話恭喜晒,以為我真係有咗!有啲街坊仲擔心我,叫我大住個肚唔好再跑!」C君抵死地搭嘴,曲線讚Mandy好戲:「今次佢扮大肚,街坊就以為真係大肚。下次如果佢演死(亡)戲(份),大家可能以為佢真死!」Mandy反擊指C君於劇中無亮眼表現,C君自辯:「我就表演『廢』,做番我自己!」

跑快過巴士

Ben又加入「罵戰」爆C君拍跑戲拍到氣喘,C君即發揮「吹水」本色:「難為我要扮跑得慢過佢哋,我對腳又長,人又高,平時跑得仲快過架巴士!」Ben笑指有C君在場,每日開工都要忍笑收場。

文:影視組