張頴康兩公婆陪玩陪影氹囡
捱足16年，今年事業大豐收的張頴康，不時與太太麥雅緻及可愛女兒小豆放閃晒幸福，昨日傍晚兩公婆又再出動，帶同小豆以一家三口冷帽Look玩轉嘉年華，活潑的小豆未入場已興奮得到處跑，身為廿四孝老竇的張頴康睇實愛女，全程跟到實。
張頴康憑電視劇《一屋老友記》彈起入屋，早前於《萬千星輝頒獎禮2016》以大熱姿態奪「飛躍進步男藝員」獎，捱足16年終於有出頭天，獲獎後的張頴康不時透露最想和同是藝員的太太麥雅緻添多一名小朋友。昨日傍晚，兩公婆帶同2歲多的女兒小豆往中環玩轉嘉年華，一家三口以親子冷帽裝繼續放閃。
鍾一憲與同性密友孖住嚟
傍晚5時多，張頴康和麥雅緻一家冒着寒風和市民排隊等入場，活潑的小豆在等候期間已經按捺不住興奮心情，不時開心地到處奔跑，張頴康兩公婆輪流睇實寶貝女，與張頴康一家同往的更有歌手好友鍾一憲及其同性密友，DJ李志剛等人，數個大人圍住小豆團團轉陪玩。
可愛的小豆一身粉紅打扮萌到爆，甫入場便有粉絲上前邀張頴康和小豆影相，女兒受歡迎，張頴康特別開心，一手抱起小豆和粉絲拍照，影完相，一行人再去掟公仔氹小豆開心，小豆抱住戰利品再開心地玩機動遊戲，眼見女兒玩得開心，張頴康兩公婆一臉冧樣，化身攝影師追住女兒影相。唔講唔知，麥雅緻數日前才上載一家三口玩嘉年華照片，相隔數天又玩多次！
文、攝：追蹤組