余文樂求婚勝地開餐 蜜會新歡斷正

「潮界男神」余文樂回復單身三年,最近被爆戀上台灣富二代女星王棠云,兩人愛得癡纏,到美國紐約共度第一個白色聖誕節斷正,被粉絲在一間出名求婚成功率高的浪漫餐廳捕獲甜蜜撐枱腳,「無腳雀仔」莫非也封盤?至於已為人夫的古巨基,今個聖誕同樣到了紐約開騷,古太Lorraine當然夫唱婦隨。

被形容為近年娛樂圈「鑽石級」筍盤的余文樂,緋聞女友源源不絕,最新鮮熱辣是被爆與台灣皮帶大王千金、女星王棠云(Sarah)秘戀撻着,雖然樂仔死口不認「新樂嫂」,堅稱兩人「真是」朋友關係而已,但樂仔與富二代Sarah在美國紐約共度浪漫聖誕佳節斷正,被粉絲在出名求婚容易成功的星級餐廳捕獲撐枱腳。

約會長髮女

剛為電影煞科的樂仔,日前才被本報捕獲與好拍檔楊千嬅離開煞科慶功宴時,當街依依不捨又攬又啜面,轉頭他已急急腳飛到紐約會伊人。樂仔跟Sarah打得火熱,早就計劃遠赴紐約共度首個白色聖誕節,有網友大爆在美國一間傳說求婚成功率最高的餐廳品嘗聖誕大餐,其後得知有朋友在Boxing Day在同一間餐廳撞見樂仔,在網友要求下即將朋友偷影到樂仔與長髮女子撐枱腳照開心Share,有網友直指長髮女子正是「新樂嫂」Sarah。

「休假不拍照」

樂仔與Sarah蜜遊紐約斷正,其實連日來都有網友在紐約街頭、商店捕獲樂仔這位潮男,頭戴Cap帽的他身穿長褸型仔出巡,與男友人在Soho區逛街,有網友見到樂仔購物後在櫃台畀錢,雖然曾上前問他是否余文樂,但對方卻拍着他們膊頭說:「我在休假不拍照哦!」還禮貌地說了句「Merry Christmas!」氹得粉絲開心到「醉」!不過當日樂仔身邊未見Sarah蹤影,之後亦有人在街頭捕獲他與友人的潮味背影,戴着Cap帽的他與當日在餐廳撐枱腳戴的帽是一樣。

之前樂仔被追問到與Sarah拍拖的傳聞,他透過經理人否認:「真係冇女朋友。」不過日前Sarah談到與樂仔的緋聞時,漏口風說:「順其自然!」至昨日向樂仔經理人公司求證紐約拍拖斷正一事,今次樂仔未有否認,而是「冇回應」,莫非男神鋪路封盤?

文:音樂組

第一手消息請下載on.cc東網iPhone/iPad/Android