「小三」Charlie自保急斬4日情

現年19歲的Bella今年8月與拍拖年多的英國男星Gregg Sulkin分手後，私生活可謂亂晒籠！她分手僅1周就被傳由直變攣，與哥哥Remy的前女友Bella Pendergast搭上，更驚死人唔知，在社交網公開與「前阿嫂」的咀嘴照，留言承認是雙性戀！1個月後她又換畫，與《少年狼》（Teen Wolf）男星Tyler Posey拍拖咀嘴，而Tyler正是其前度Gregg的死黨，Bella認真唔熟唔食！正當以為Bella與Tyler會認真交往時，卻突然殺出第三者！

沙灘咀嘴拖手仔

本月18日，Bella與25歲的美國新紮男歌手Charlie Puth在邁阿密出席聖誕電台騷Jingle Ball，期間在當地的沙灘玩樂。打扮性感露半球的Bella被拍得與Charlie咀嘴，兩人並肩而行，Bella一度小鳥伊人地依偎着新歡，兩人更疑似拖手！

外界以為Bella再次換畫，她於周三卻上載與Tylor深情對望的合照，並留言表示想回憶一下，網民留言直斥她一腳踏兩船，背男友與Charlie偷食，《Paper》雜誌更趁機抽水，昨日公開Bella受訪時大談與Tyler拍拖的甜蜜事。

不過Bella今次可謂踏沉船，Charlie前日（12月22日）早上在社交網連番留言，誓要劃清界線，明言不會做第三者：「我唔敢相信我睇緊嘅嘢，冇人嘅心意應該被如此糟蹋，我唔會牽涉當中。我私底下唔認識Tyler，不過我知道佢唔應該被如此對待。」有網友留言告知Bella仍與Tyler蜜運中，Charlie回覆留言時指Bella早前聲稱已與Tyler分手，他亦是剛得知兩人仍在拍拖，並強調自己只求平靜，只想抽身。

唔認拍拖 「只係朋友」

昨日，似乎不甘心被Charlie狠撇的Bella終於在Twitter發聲，留言否認一腳踏兩船：「Tyler同我已分手兩個多星期，而Charlie同我亦唔係拍拖，我哋只係朋友。嗰篇文章（《Paper》訪問）係好耐之前寫。」至於疑戴綠帽的Tyler則至今仍未在社交網回應事件。

文：外娛組