許廷鏗等多3年儲歌開紅館騷
許廷鏗入行七年，累積不少耳熟能詳的歌曲，卻被入行時間比他短的好友吳業坤爬頭登上紅館。許廷鏗未有妒忌對方，大讚坤坤有資格上紅館，他則會按部就班，給自己三年時間，儲夠歌才開紅館騷。提到他與鄭欣宜的「孖寶情」，許廷鏗坦言最初與對方「火星撞地球」，但全靠欣宜率直的個性才令他打開心扉，但絕不會愛上女方，視欣宜為家姐的他坦言：「感覺好亂倫！」
做導演 唔係搶人飯碗
歌手許廷鏗（Alfred）今年樂壇成績理想，推出歌曲《我的志願》、《你在我在》及《痛醒》均大受歡迎，他為《我》親自執導的MV在facebook更獲得超過150萬的瀏覽量。他坦言沒想過如此受歡迎，原意是希望透過改編真人真事帶出珍惜生命的訊息。Alfred拍MV前搜集有關自殺人士的心理分析，又親自找場務、髮型師、服裝及邀影后鮑起靜演出等。雖然辛苦，但他覺得很有成功感：「起碼出到嚟件事係我個腦入面嘅畫面。（想再做導演？）會o架，如果我真係有嘢想講，或真係有嘢要用畫面發放出嚟。所以我唔係要爭導演飯碗，而係呢件事喺我個腦入面，點樣將腦入面嘅嘢演變成實際畫面，搵人哋做未必做到。第日如果有題材好值得變成畫面嘅話，我會繼續去做。」
撐吳業坤成功有理由
Alfred於2009年參加《超級巨聲》，2011年正式簽唱片公司，多年來累積不少耳熟能詳的歌曲，如《螞蟻》、《面具》、《青春頌》等，亦唱過不少劇集主題曲，高大靚仔的他形象入屋，儲落大批歌迷，但竟被好友吳業坤搶先一步，率先在紅館開騷。Alfred說：「佢真正入行嘅時間其實係比我長，雖然參加唱歌比賽同出唱片係我先，但喺online市場佢行先我好多，佢儲緊嘅嘢唔係純粹由電視台畀佢，係自己儲番嚟，所以佢依家呢個成就唔係冇理由。」
Alfred自言喜歡按部就班：「唔知關唔關我係金牛座事呢？我鍾意穩打穩紮，行呢步（上紅館）真係要行得好實，唔想上到去都係冇信心，所以我希望儲夠歌、儲夠想講嘅嘢先去挑戰呢個舞台。」他自爆之前有一次上紅館的機會，但他卻推了：「2013年我開完九展演唱會後，第二年公司有問我幫唔幫我入紙紅館，但當時我覺得個騷已經出盡渾身解數，所以想畀多少少時間自己儲歌，呢個舞台有啲神聖，所以唔想亂踩。（想幾多年內做到？）我畀自己三年時間。」
異父異母低能巨孖寶
身為歌手兼牙醫的Alfred除了事業有成外，人緣好的他在圈中亦有不少知心好友，他與鄭欣宜（Joyce）更friend到組成「異父異母低能巨孖寶」，兩人非一般的友情令不少人誤以為他們有可能發展，Alfred笑言：「真係冇咩可能，佢家姐嚟o架，感覺好亂倫呀！」他坦言從沒想過會跟對方成為朋友，更遑論做情侶：「一開始以為大家性格唔會撞得埋，因為我本身唔係好講自己嘢，而佢就係本open book。由細到大大家已經知晒佢啲童年，所以佢都順應天命做一個直接嘅自己，呢樣性格上嘅特質對我嚟講係吸引。其實我哋係可以好衝突，完全係火星撞地球，但我肯open up自己去畀佢知我嘅嘢，或者佢畀我知佢嘅嘢，互相影響，令我呢幾年有唔同。」
Alfred亦分享兩人之間的難忘事：「好記得喺我2013年嘅演唱會上，個騷一開始我已經數住仲有幾多首未唱，但其實咁樣係唔會enjoy！直至Joyce出嚟同我唱《將冰山劈開》，叫我放鬆番，先令我記得番做緊entertainer，首先係自己要enjoy先。」
緋聞多多朋友怕怕
朋友多到數唔晒，愛情方面Alfred亦多姿多采。他入行以來傳過不少緋聞，更包括斷背情。他對此坦言：「新聞炒作都過咗咁耐，無論男男女女其實都影過，even一啲中學、大學同學都影過，要出賣都已經出賣晒，所以依家醒目咗，同朋友見面會揀人哋屋企，成班朋友一齊玩，唔關係咪拍拖問題，係唔想影響朋友，因為佢哋係唔需要承受呢啲嘢。之前啲新聞對我影響唔算大，但反而影響咗啲朋友，有啲朋友因為咁而覺得好難再去keep友誼。（介意報道咁寫你？）慣咗啦，娛樂圈係咁。」今年28歲的他離三十而立還有兩年，問到家人可希望他早日成立家庭？他說：「我對上仲有兩個家姐一個阿哥，所以壓力未去到我身上。佢哋都知娛樂圈要搵個伴係幾難，我又唔鍾意同圈中人拍拖，覺得娛樂圈係另一個世界，有時啲嘢好似同社會唔係好接觸到，我唔想連工餘陪伴侶嘅時間都係圍繞娛樂圈。」
場地：HeSheEat
文：音樂組
攝：劉智源