洪永城馬國明情敵檔倒數
洪永城出席活動時自爆會跟女友唐詩詠玩「黐脷筋」耍花槍，大晒恩愛，談到聖誕會否邀請「情敵」馬國明開P，他即預告除夕夜會與對方「開年」，將與他及詩詠齊做除夕倒數騷，三人行有錢齊齊搵，實行Happy New Year！
洪永城、朱晨麗與蔡思貝昨日為無綫賀歲劇《味想天開》宣傳，該劇將緊接馬國明的《流氓皇帝》推出，洪永城與蔡思貝以古裝新郎新娘造型現身，並應要求由洪永城孭着思貝玩新人遊戲，思貝玩得投入，更笑言要向唐詩詠備案。
為新劇角色苦練黐脷筋的洪永城說：「練咗幾個禮拜，如果唔練，觀眾聽唔到就要睇字幕，咁就變咗金剛！（有冇對住女友唐詩詠講情話時黐脷筋？）黐咗一次，但佢話：『唔好嘈！』（打情罵俏？）都好正常！」聖誕將至，問他會否邀情敵馬國明一齊開聖誕Party？他說：「佢好忙，不過我大除夕好似會同佢倒數，仲有唐詩詠添！係『情敵、情侶檔』。（到時打大交？） 開個年先咁啦吓話？唔會，新年大家開開心心，Happy New Year！」
朱晨麗洗豬腸生人勿近
玩遊戲期間，洪永城笑指思貝「猴擒」，思貝說：「大家都知洪永城不嬲出名講嘢唔用腦，大家都係玩得嘅。」問到以出嫁Look宣傳會否勾起與男友麥秋成分手的傷痛回憶？她說：「唔會，我好開心，今日同好姊妹孫慧雪同日『結婚』。」而朱晨麗則笑指拍該劇最難忘是要「洗豬腸」：「係真豬腸，好臭！佢哋一個二個彈開晒，冇義氣！」
文：影視組