43歲張沅薇做知客撐起頭家
昔日主持兒童節目《閃電傳真機》的「Amy姐姐」張沅薇當年憑一雙大眼電暈一眾少男，據知她與著名音樂人王雙駿分手後，一直獨力照顧17歲的兒子。現年43歲的她最近轉做知客，雖然闊別幕前，但依然非常省鏡，女神Feel不減！
90年代模特兒出身的張沅薇（Amy），是資深藝人良鳴的孫女，當年加入TVB後即獲安排與譚玉瑛及朱茵等主持兒童節目《閃電傳真機》，因外貌清純加上一頭長髮及大眼，「Amy姐姐」成功吸納不少粉絲，還獲邀參與不少MV、電視劇及電影的拍攝，據知當年電視城外不時有粉絲等偶像。
依然省鏡 無意復出
貴為一代女神的Amy，爆出戀上曾為陳奕迅、楊千嬅等任監製、得獎無數的金牌音樂人王雙駿，還甘願在事業高峰時全面退出生BB，可惜這對「美女與才子」的組合最終以分手作結。Amy一直獨力湊大兒子，為家計曾任秘書及牆紙公司推廣等工作，最近更轉行做知客，到一間新派粵菜餐廳打工。
記者日前走訪Amy工作的餐廳，穿上制服的她雖然闊別多年，但依然非常省鏡，明顯保養不錯。期間，Amy與同事有傾有講，落場時間亦沒有周圍走，留在餐廳補妝並托頭休息，勤力工作的她未幾更主動幫忙收拾餐枱擺設，相當投入。當記者上前訪問時，Amy起初略為抗拒，其後才大方企定定，問到會否復出幕前時說：「唔會啦！我轉咗行好多年。（係咪獨力養個仔？）係呀！要照顧屋企人。（依家有冇男友？）冇呀！有冇好介紹？」
譚玉瑛：人各有志
曾合作的譚玉瑛被問對Amy轉行會否感可惜，她坦言人各有志：「唔會！每個人都有想做嘅嘢，之前喺街撞過佢，知佢生活得好開心。（見過佢個仔？）冇呀！嚟緊都想約佢同成班舊同事食飯。（佢做單親媽媽！）唔會覺得佢慘，佢個人好正面！」
文、攝：追蹤組