孫慧雪喊住嫁趕生龍鳳胎
昨日34歲的「宅男女神」孫慧雪下嫁圈外男友羅天彥（Edwin），谷胸上陣兼與老公甜蜜互咀10秒，雖然不諳中文的Edwin宣讀誓言時沒甚感情，但足令她感動流淚，更爆老公為氹姊妹團開心，準備了大疊十蚊紙幣、共五位數字作開門利是，故婚前每日忙於打爆銀行電話兌錢，而一對新人婚後將火速造人，Edwin揚言生龍鳳胎便皆大歡喜。
「宅男女神」孫慧雪昨日正式「封盤」，下嫁拍拖四年的有米圈外男友Edwin，一對新人於愉景灣舉行童話婚禮，穿上谷胸婚紗的雪雪，身材有點圓潤，手臂相當有肉地，顯然未有為大日子特別瘦身！不過新娘子依然省鏡，手上鑽戒閃爆，宣誓時更感動得眼濕濕，並與老公互咀10秒之久，表現甜蜜！
開門利是大疊十蚊紙
簽字儀式後，Edwin把香檳一飲而盡，就連雪雪手上的香檳也一併飲完，及後一對新人坐上馬車走一圈後，便孖住接受傳媒訪問，對於被稱呼為羅太，雪雪冧笑說：「多謝！但老公好怕醜。（頭先見你喊，老公講咩令你咁感動？）佢照讀誓詞我都喊。」Edwin坦言緊張得手心出汗，腦海一片空白。談到早上接新娘情況，雪雪笑說：「最難係講愛的宣言，老公睇唔明啲中文，唔知自己讀緊乜，所以讀到一啲感情都冇，但我都收貨，因為過晒時。（開門利是幾多位數？）五位數，好大疊十蚊，姊妹好開心，點知打開全部十蚊同一蚊，老公呢排好忙，成日打去銀行兌錢。」更指晚上筵開廿多圍，賓客大多是由細識到大的朋友及無綫同事，如前港姐蔡思貝，感激對方忙裏抽空為她擔任姊妹。
「戒口」唔飲酒
問到將到哪裏度蜜月？雪雪表示尚未決定，皆因尚有工作，否認婚後做少奶奶：「唔可以唔做，我堅持要繼續做嘢。（幾時先造人？）一邊工作一邊造人。（係咪可以恭喜你？頭先見你唔飲酒！）唔係，自己一飲酒就面紅，驚夜晚會浮粉，所以就唔飲，仲要影相嘛！」眼見其身形圓潤，雪雪搞笑說：「我忍唔到口食嘢，尋晚凌晨3、4點都食咗卡邦尼意粉，仲食燒肉，因為瞓唔到，咁肥啲有福氣。（戒指幾卡？）唔知，求婚同結婚戒指都有戴，我手指好細，睇落好似好大粒，老公咪有着數囉！」Edwin被問到喜歡仔還是女？他說：「做爸爸就順其自然！我鍾意女仔，太太鍾意男仔，所以生龍鳳胎最好。」
文：影視組