欣宜飛廿幾粒鐘 搶花球成功！
前晚到達溫哥華的歌手鄭欣宜（Joyce），昨日身穿大Deep V裝觀禮，她坦言感到後悔：「因為好凍，黐咗兩個暖包。」記者取笑她特意來搶花球，Joyce得戚地說：「係呀，係呀！（苟芸慧做你對手喎！）佢唔夠我鬥嘅，佢今日着到上嚟呢度（指密實），我好有信心。（志在必得？）唔係！其實我好怕醜，又未見過Joshua（強強）同香香屋企人，我今朝化妝時諗飛嚟嗰廿幾個鐘，個party又完全唔識人，點解要咁對自己。當我喺教堂見到Joshua望住佢老婆個眼神，係值得嘅！」
Joyce大讚兄弟團全部都好靚仔，問可有鎖定目標？她說：「冇嘅！可能好多男仔鎖定目標係我呢！祝我好運啦！」她向一對新人送上祝福，又自爆第一次見強強：「我之前同香香拍《辣警》（辣警霸王花）認識，拍完冇耐佢同我講：『我拍拖啦！』我問佢係邊個，send相嚟睇吓，張相係香香攬住佢，好sweet。見佢每次提到Joshua都好開心，近排我哋拍緊《老表》，就算幾辛苦，每當香香收到Joshua嘅message，都會笑得好開心。」
事前信心滿滿的Joyce果然不負眾望，在搶花球環節成功揮贏苟姑娘，更將「戰利品」放上網，留言：「一拋即中。It was a little rigged.」笑指接到花球是「內定」。見Joyce笑到見牙唔見眼，網民紛紛留言道：「嫁喇！嫁喇！」