黃建東琴技了得 包辦作曲編曲

藝人黃建東(Derek)憑惡搞日本歌曲《PEN-PINEAPPLE-APPLE-PEN》(PPAP)上位,搞笑形象深入民心,原來Derek不只是搞笑能手,還很有音樂才華!記得他2011年參選香港先生當晚,就憑自彈自唱《為你祝願》奪得演藝潛能大獎,這首歌更由他一手包辦作曲編曲,琴技亦非常了得!

Derek透露八歲開始學彈鋼琴:「當時一直都係學傳統鋼琴,考到七級,中七之後我去咗美國讀大學,都有keep住彈琴,仲開始接觸音樂劇,喺美國為兒童劇場擔任過音樂總監,指導埋成個騷。」其後Derek回港接觸流行曲,所以創作了《為你祝願》一曲:「呢首歌係我自己構思,包辦作曲、編曲、主唱,期待明年編曲、錄音同派台,我好喜歡唱歌同彈琴,希望可以成為一個歌手!」由於工作關係,Derek一直未有抽空考琴,其未來目標是報考鋼琴演奏級,但其實Derek現時已經彈得又唱得,音樂造詣簡直是「我至叻」!