Game都有得玩！《街市》三寶陪你打四圈

無綫打造的「大台網」睇得之餘仲有得玩，其中特設「藝人陪玩Game」平台，發展一個由藝人陪打麻雀的遊戲，星級「雀」友鎖定近日與街坊觀眾「打成一片」的節目《街巿遊樂園》演員江美儀、麥長青、滕麗名與陳浚霆，認真引人入勝！有云牌品與人品一一在麻雀枱上見真章，早前被指鬧拍檔的江美儀笑說：「要我同班街坊打麻雀，隨時變魚腩啦！因為我平時打牌都唔係好叻，同埋打好細。（怕同街坊打牌時遇牌品唔好反枱？）唔會啩？同啲街坊玩吓冇所謂啦！」滕麗名自爆對上一次打麻雀已是五年前：「當係一個打風節目，依家身邊好少朋友打，但呢個網上Game都幾得意，如果增設多啲更益智嘅遊戲就更好！（上去打牌呃吓網友送花？）呃送花就唔好，但都幾有趣。」