林泳淘 陳潔玲 陳婉衡假姣精拒收兵
無綫三位小花陳婉衡（Alycia）、林泳淘及陳潔玲（Christy）外形索爆，在劇集中出盡法寶色誘男士，令男觀眾睇到鼻血長流！不過華麗背後，幾位女神卻擁有極其矛盾的一面，演姣精原來只是劇情所需，現實中卻拒絕收兵，性感尤物Alycia竟然超麻甩，性格爽朗的泳淘是名烏龍王，斯文的Christy就愛把自己搞得蓬頭垢面，愈臭愈開心……真係OMG！
W：林泳淘 C：陳潔玲 A：陳婉衡
收起天賦本錢
無綫咪神陳婉衡身懷36E勁爆上圍加結實腹肌，電力十足的陳潔玲擁有32C配白滑長腿，眼大大林泳淘的32D身材一樣不容忽視，三女外形索爆，在劇集《來自喵喵星的妳》盡情利用天賦本錢，瘋狂向C君、溫家偉及何遠東放電攞着數，本以為演姣精對三位尤物易如反掌，然而她們均表示難度甚高，更笑言角色與現實相反，真正的她們都謝絕「收兵」！
W：有朋友話見到我發姣就覺辛苦，因為我私下大情大性，偏向男人婆，要做姣真係難，我不停試唔同姣法，導演都話我唔夠。
C：都幾難演o架！最難係同溫家偉唔過電，佢覺得我一啲都唔正，我要好用力令佢覺得我好正！反而Alycia應該最着數，因為外形已經好吸引！
A：唔係呀！我開頭都覺得好難！角色要有騷味，行路行到有女人味都係學問，結果出嚟有人話我做得似，究竟係讚我定話我呢？
C：我哋三個同角色都好大分別，我諗最似都係靚女囉！戲入面我哋都係港女，會收兵拎吓着數，現實中你哋有冇收兵？
W：我唔會，既然我冇咩畀到佢，知佢對我有好感，就會立即斬纜。
C：我可能有時唔小心收咗兵，開頭當係朋友，但發現佢對我過分好，我就會同佢講清楚。
A：我都唔鍾意爭人嘢，譬如你車我，我就會請番你食飯，唔想欠人，要有借有還。
W：我有個細佬，我諗如果佢做咗人哋隻兵，我一定唔開心，所以我都唔會咁對人。
追仔各師各法
三位女士有樣有身材，想必在愛情路上無往而不利，然而她們面對心儀對象的態度大有分別，Christy會主動出擊示愛，泳淘則要姊妹壯膽幫拖，豪爽的Alycia竟然會變鵪鶉，因而錯過不少良緣。
C：我以前好主動！要諗盡方法令佢鍾意我，例如成日唔知點解喺佢面前出現，記得為咗追個男仔，我明明唔食羊，仲要腸胃炎都陪佢食羊肉火鍋，結果當然成功追到佢啦！不過依家人大咗諗法唔同，都想畀人追吓。
W：我會為個心儀對象做好多嘢令佢鍾意我，但臨門一腳，一定要佢表白，有成功過o架！如果我鍾意個人，相信身邊個個都知，我仲會搵姊妹幫手。
C：呢樣我就唔會，如果衰咗咪好肉酸？
A：唉！我就冇呢啲成功例子，我唔會做主動，我好渣o架！對住有Feel嘅人會好怕醜，望多兩眼都面紅，只會暗地希望佢鍾意我。
女神戙腳擘髀
女神並非完美，Alycia、泳淘及Christy亦各有「盲點」，但想不到揭開女神面紗會是如何難以接受……三女互爆或自爆鮮為人知一面，大家請做足心理準備，唔好嚇親！
W：我就冇咩怪習慣呀，咩都表現晒出嚟，係超級論盡，成日漏嘢，出咗門口都要返轉頭幾次，係烏龍王！
C：我鍾意睇啲好奇怪嘅嘢，前排會上網睇高清擠暗瘡片，最近就會睇人做手術，睇開刀生BB，見到鎅開層皮拎個BB出嚟，我就覺得好真實好正！
W：Christy真係好大膽！我哋睇鬼片，我會驚到大叫，佢就好冷淡咁話未出嚟呀，叫我冷靜啲。
C：你睇我斯斯文文要人保護，其實相反，係我保護番人。至於Alycia原來好Man，我哋去過澳門拍旅遊節目，咪睇佢係性感尤物，一返酒店房就除面衫，仲坐低戙起隻腳擘大對髀！
A：我個人係幾雜亂，屋企啲衫疊到勁高！
C：不過唔夠我犀利，如果唔使做嘢，我會挑戰幾日唔沖涼唔洗頭，令自己成面油，個身好臭，我就會好開心！哈哈！
A：所以我哋好適合同房，唔會覺得對方污糟！
後記：三個女人一個墟
雖然性格各有不同，但Christy、Alycia及泳淘貪靚的女人天性全無二致，一坐埋即雞啄唔斷，討論最新護膚品及粉底效用，興之所至更玩網上直播，嘈到拆天，又再印證「三個女人一個墟」這個真理。
文：立影
攝：張福宏
林泳淘及陳潔玲服裝：Spark Fashion Shop
場地：火車頭越南餐室