徐巧嬌獲老公送逾千萬黃鑽

MOISELLE老闆娘徐巧嬌（Shirley）早前榮獲金紫荊女企業家獎，昨晚出席公司旗下品牌進駐香港五周年酒會，老公陳欽杰與兒仔陳栢熹亦在場招呼賓客。Shirley開心表示感到榮幸，更獲老公送黃鑽耳環作獎勵：「佢送咗對黃鑽耳環畀我。（幾多卡？）3卡一隻，一對6卡。（起碼七位數字？）唔講幾錢，對耳環其實我之前睇中咗，但好貴冇買到，佢送畀我時都好驚喜。」事後追問陳生送給太太的耳環幾錢，陳生透露是8位數字，逾千萬，認真錫老婆！Shriley透露今次得獎有很大鼓勵：「得獎令我更有衝勁，雖然來年香港市場都係困難，但要積極去面對，我哋都會加強、投放多啲資源喺網上，同埋新加坡、台灣、大陸同澳門都會有發展，但唔會睇淡香港，希望喺零售方面有多啲人才，租金唔好咁高，大家合力做番香港係購物天堂。」