陳意嵐行性感起步易斷尾難

混血影壇新人陳意嵐去年拍電影性感上陣令人留下深刻印象,但揚言想擺脫性感,希望透過選美令大眾認識性感以外的她,奈何未能成事,更自爆在比賽中聽到閒言閒語,深感委屈的她曾考慮退選,但高呼:「我一直都好想做演員!」

影壇新人陳意嵐(Tarah)去年在電影幾乎全裸上陣,與杜汶澤肉搏令人留下深刻印象,加入影壇一年多的她希望有性感以外的演出,她說:「唔覺得自己入咗行年幾,因為唔係拍咗好多日戲,自己仲做緊化妝師,生活上唔係好大轉變。我一路都好想做演員,好想做性感以外嘅演出。(想做咩?)想做鬼或者喪屍,不過香港好少拍呢啲電影,加上我嘅身形,覺得自己適合做武打。」

劈頭就問:可以除衫?

Tarah無奈表示很多工作都與性感有關,坦言只想做好演員這份工:「我一直都好想做演員,做咗一套以為會繼續有,但大家淨係記得陳意嵐係識跳舞同性感囉,咁應該係唔識做戲o架啦!又或者有好多戲搵我,第一件事都係問我:『可唔可以除衫?』」

Sexy唔等於Cheap!

Tarah參加了ViuTV舉辦的選美真人騷,坦言希望藉此讓人認識性感以外的她,奈何仍難以擺脫性感演出。她表示聽到不少閒言閒語,令她大感委屈,曾萌生退選念頭:「我目標唔係贏冠軍,係贏大家嘅尊重。可能一開始我畀大家嘅印象係性感,有時會有侮辱性嘅說話,但陳意嵐除咗性感以外係有其他嘢可以做。(侮辱說話邊度嚟?)網上就最多啦!其實玩緊嗰陣我算比較好彩,身材唔係特別好,比較少啲人身攻擊。(好委屈?)真係有覺得好委屈嘅時候,我玩呢個比賽就係想擺脫性感,其實性感係一個難嘅演技,但大家就覺得唔係演技,如果你演繹到性感,啲人會覺得好Cheap。玩呢個比賽反而加強咗性感形象,但人哋睇嘅眼光唔係咁,大家睇性感就係Cheap,我覺得好氣餒。(有冇諗過退選?)有諗過,有一刻係想,覺得自己唔係要做乜,點解擺脫唔到呢件事(性感),會唔開心,但覺得有啲嘢做咗就要堅持。」

文:專案組

攝:劉斌 

場地:hmv Bar&Restaurant 

化妝:Anni Teng 

髮型:Kel Ching@salon amarone