吳業坤手緊買樓Hold住先！
屋邨長大的吳業坤一向夠「宅」又貼地，近日為新碟《百姓》更凸顯「民間歌手」形象，落區到舊式屋邨的遊樂場、理髮店及茶檔等取景，想不到他竟是「阿伯殺手」，獲老師傅傳授「倒奶」秘技！
堪稱「貼地歌手」的坤坤，早前為專輯封面「落區」，到南山邨及彩虹邨等舊式屋邨取景，更穿梭遊樂場及小店拍攝，期間坐在茶檔「食好西」歎杯凍檸茶時，茶檔老闆認出他，更傳授沖奶茶秘技！其後坤坤到理髮店看老師傅剪髮，勾起不少童年剪髮回憶。
茶檔老闆傳授秘技
問到為何不在現居的「主場」樂富邨取景，坤坤說：「因為南山邨同彩虹邨仲保留住一啲舊式嘅小店同遊樂設施，好有舊邨味道，我想拍出呢啲舊式香港情懷。」談及被阿伯、阿婆圍觀，他自信爆棚地說：「我咁紅……講笑啫！我啲Fans嘅年齡層由3歲到70歲都有，記得有個3歲小朋友對住我唱我首歌One、two、three、four……」而今次落區最令他感動的，是一班小店老闆的熱情招待，不介意拍攝阻礙生意。問到茶檔老闆可有收錢？坤坤說：「老闆明醒我，但我覺得人哋小本經營，點都要畀錢嘅，促進吓經濟發展。」談及何時達成置業心願，他說：「未呀！一個將軍澳單位至少要五百幾萬，就算夠畀首期，但月供兩萬蚊，一個年輕人要供樓養家好手緊，所以再等吓先啦！」
如今唱片市道低迷，坤坤仍能推出實體碟，對此，星娛樂唱片公司總經理朱先生表示，新碟連同之前的演唱會，公司在坤坤身上投資了三百萬，但經已回本之餘還有錢賺，所以坤坤絕對是公司的實力股。而坤坤亦未令公司失望，新碟甫推出即登上HMV銷量榜首位。
文：音樂組