盧頌之呻腰攰挺肚試大床

現年26歲的DaDa與健身教練男友King感情穩定，雖然曾經歷不少風波，但最終都修成正果。早前DaDa突然宣布懷有五個多月B女，更在社交網站晒肚放閃，兩口子靜待寶貝女的來臨。準媽媽DaDa公布喜訊後深居簡出，至昨日才出動與King在九龍灣大型商場逛街。戴上冷帽的DaDa穿衞衣及灰色緊身運動褲，腹大便便的她，手腳仍然纖幼，孭住背包的她步履甚輕鬆，毫不論盡。

拍拖睇家品

大肚婆唔餓得，DaDa先在快餐連鎖店醫肚，一口氣買兩個朱古力批，胃口甚好。之後就與King手拖手步向家品部，兩人專攻廚具及清潔用品，期間又拿起地拖玩，DaDa毫無顧忌又俯身又趷高拿垃圾筒，King即出手幫忙。期間，DaDa以手按腰又摸肚，似乎動作太大略感不適，及後再十指緊扣轉移睇大床，童心未泯的DaDa一見大床即整個人坐上去，最後要由King伸手扶起身。DaDa再翹住男友走去睇梳化，King為她校高腳踏試坐，DaDa摸住大肚流露幸福表情！

佗B五個月的盧頌之肚大如籮，行行吓街玩自拍。	盧頌之睇廚具時不時摸肚兼皺眉。	盧頌之翹實King，成個攰字寫晒上面。

下周開餐廳

事後記者致電DaDa，問到是否選購傢俬築愛巢？她笑說：「唔係，因為King下星期會開餐廳，所以咪同佢去睇吓廚具。（試埋大床喎？）我大肚之後好易腰攰，King驚我辛苦，所以諗住換張大啲嘅床，咪順便睇埋囉！」她稱與King有共識，待明年三月B女出世後，才買樓築安樂窩！

文：名人組