黎耀祥教曹永廉剝衫搶分 龔嘉欣露一腿
台慶頒獎禮在即，眾候選藝人昨於TVB二千人盆菜宴上各出奇謀拉票，作最後衝刺！王浩信與太太陳自瑤組「夫妻檔」放閃，互投之餘，自瑤更希望「過票」畀老公！人氣「情侶檔」胡定欣與陳展鵬雖未合體拉票，但都視對方是視帝視后，最瞓身落力的一組則要數「兄弟幫」黎耀祥與曹永廉，貴為三屆視帝祥仔過「Lucky」畀曹永廉，只為阿廉拉票，更叫阿廉「除衫」谷票！
《萬千星輝頒獎典禮2016》舉行在即，近日熱播的台慶劇陸續爆出視帝郭晉安、女配龔嘉欣等人選，令獎項競爭更為激烈！昨晚舉行的「TVB職藝員聯歡晚宴2016」集合近二千名全台職藝員及高層，候選大熱包括黎耀祥、王浩信、陳展鵬、曹永廉、龔嘉欣等均有現身，向一眾台前幕後埋身拉票。
王浩信陳自瑤齊發功
黎耀祥與好兄弟曹永廉分別憑《公公出宮》獲提名「最佳男主角」及「最佳男配角」，他倆組「兄弟檔」上台谷票。有望衝擊四屆視帝的祥仔，表示一班兄弟會落力為男配大熱曹永廉谷票，反觀自己角遂獎項的信心卻是「一半半」，又指睇好郭晉安拎獎：「安仔啦！呢啲災難劇，展鵬就動作劇，我哋《公公出宮》梗係要支持啦！」阿廉聞言獲兄弟全力支持，大表開心，祥仔即笑謂：「都廿幾年啦！」阿廉互寸說：「你年年都唔撐我，你套劇有份咪撐我囉！」問阿廉有何方法拉票？祥仔搶答說：「除衫囉！」還叫阿廉講定得獎感言：「你依家好講定呀，到時唔知有冇機會講！」
同樣有份入圍「最佳男主角」等四項提名的王浩信，與太太YoYo（陳自瑤）孖公仔現身，浩信表示女配已投太太，YoYo亦揚言會投老公。問到有何好計幫老公拉票？YoYo說：「各位朋友如果想投我嘅，唔該轉晒去投我老公啦！佢係《EU超時任務》真係做得好好，佢喺我心目中已經拎咗視帝！」浩信聞言笑說：「照你咁講，我都當自己拎咗視帝！」視帝之路還有展鵬等勁敵，浩信笑言：「佢（YoYo）成日睇展鵬啲劇睇到眼甘甘。（有信心奪獎？）劇集歌曲獎好大機會係展鵬同胡定欣喎！之前已經橫掃星馬，佢哋合唱嗰陣啲眼神同火花簡直殺死人！」
陳展鵬撐硬胡定欣
已連奪馬來西亞及新加坡兩個視帝獎項的陳展鵬，大有機會再奪無綫台慶視帝成就「大滿貫」！展鵬收工才趕至，表示個人比較低調，對於奪視帝信心，他說：「係比往年開心，但平常心，做好自己，攞唔到咪再努力囉！（視帝投自己？）我會投黎耀祥，因為一年拍幾套劇，要拍出嚟有唔同都唔容易。（視后投定欣？）係呀！好朋友、情意結，今年都應該係佢(o架)喇！我心目中都係揀佢，睇吓佢識唔識做，會唔會請食飯啦！」
王君馨婚前衝刺
在台慶劇《幕後玩家》中爆喊成為女配大熱的龔嘉欣，以短裙現身拉票，獲不少職藝員集郵，人氣力壓同為女配大熱的勁敵王君馨，她表示與王君馨已約好互投，同時嘉欣亦會向高層埋手箍票：「今晚最齊人，就今晚開始啦！我有信心嘅，依家感覺狀態幾好。」她還積極準備戰衣，會以泳衣內襯薄紗，騷腿迎戰王君馨！至於婚前最後一擊的王君馨，由於頒獎禮與好姊妹岑麗香婚禮撞期，香香支持她留港爭獎，君馨表示若然拎到獎，就是給香香最好的結婚禮物！
文：影視組