學友主場腳震預告捉老婆入場
張學友事隔5年再在香港主場開騷，大騷神級唱功兼落力跳舞！雖然演出經驗豐富，但他坦言回到紅館開騷依然會緊張到腳震，不想在鄉親父老面前失威，而太太羅美薇近年鮮有公開露面，首場演出亦未見她到場支持老公，學友笑言一定會逼太太現身撐場！
「歌神」張學友假紅館舉行的《A CLASSIC TOUR學友．經典世界巡迴演唱會－香港站》前晚開鑼，唱完連串快歌及慢歌後，學友終開口說話：「終於返到嚟我主場，就算之前唱咗100場，返到嚟我腳都震埋，唔可以喺啲鄉親父老面前失威！有啲係外來人，我失威丟你哋架都唔開心，所以我會畀心機！」他又解釋何謂「經典演唱會」：「好多朋友話唱多啲經典歌就搞掂，但我加加埋埋有60、70首，要唱到聽朝！雖然我知你哋想，但我都50幾歲，體力頂唔順！」又坦言希望觀眾帶着美好回憶離場。
影住阿B咀范姜
學友指個唱氣氛很重要，自己卻不擅於搞氣氛，所以準備與觀眾玩遊戲。遊戲玩法是鏡頭影着台下觀眾，反應最突出的會獲得禮物，當鏡頭影着捧場客鍾鎮濤（阿B）夫婦時，阿B即撲向太太范姜玩錫錫，杜德偉夫婦亦跟住咀嘴，結果由阿B夫婦勝出遊戲，學友隨即笑說：「咁好大鑊，會唔會畀人話我造假？」然後向他們送上素描畫。
個唱尾聲，學友演唱一系列經典串燒歌，唱到《給朋友》時，舞台投影出他與多位已故巨星的合照，包括梅艷芳、羅文及張國榮等，場面感人。其後舞台變成色彩繽紛的馬戲團嘉年華，學友唱出最後一首歌《如果愛》後，向四面台的觀眾鞠躬表達謝意。
歌酬有加冇減
騷後受訪時，學友表示對首場演出表現給予80分，並透露近年深居簡出的太太羅美薇和兩位女兒都未能到場支持：「我媽咪有嚟，但小朋友要返學，太太都冇嚟，佢之後會嚟，當然係我逼佢嚟啦！」問到舞台製作費是否很昂貴？有份參與舞台設計的他說：「我個Tour攤開嚟嘅，所以OK，真係幾錢我唔知，但要多謝今次主辦放晒手畀我做，幾乎我講嘅都做到，除非技術上唔得。（減你歌酬？）冇喎！多過以前，但冇暴漲。」
此外，無綫前晚未有派員採訪學友的個唱，學友所屬的環球唱片公司發言人表示沒有邀請，因雙方在商談網絡使用權合約上仍未達成共識，所以暫時未能合作。
文：音樂組
攝：黎志輝