翠如怨未求婚 楠友：飛唔出我手指罅！

忙於拍攝劇集《使徒行者2》的黃翠如昨日由深圳趕返上水出席聖誕活動，因遇上交通意外而遲到35分鐘，甫到場即致歉。翠如表示劇中跟新婚的周柏豪有不少對手戲，直言戥對方開心：「之前同佢合作嗰陣都有傾過愛情嘅嘢，佢女友好型，佢又好型！（感染到你都想結婚？）我冇佢咁犀利！拍拍吓劇去搞婚禮！聽聞係佢女友負責好多籌備工夫。（秘婚？）呢樣係好驚喜嘅事，但對我嚟講太早，都冇人求婚！（同男友蕭正楠傾過？）冇(口架)！一直大家都要工作，拍拖時間唔夠，未好深入了解。（認定咗佢未？）嘩？你依家咁問！不如你哋問佢啦！」

認恨恨哋想拉埋

蕭正楠（Edwin）昨午與張繼聰、龔嘉欣（Katy）及陳煒等到馬鞍山宣傳劇集《幕後玩家》，講到劇中被翠如拋棄，Edwin直言一度非常失落：「大家都入咗角色，我真係屈住屈住，咁大頂綠帽笠落嚟！」對於被翠如埋怨未求婚，他笑說：「佢夠未向我求婚囉！講笑咋！講真識佢到依家都冇咩點傾結婚，雖然近排身邊多人結婚，都恨恨(口架)！但驚阿媽呢排太入戲，以為翠如真係劇中咁差，總之暫時好開心一齊。」

黃翠如話同蕭正楠未深入了解，擺明講晦氣說話！

蕭正楠席上玩拋波，眼界又幾準！ 交番個波畀你！（設計對白）

龔嘉欣向同事拉票

活動上，大會為今日生日的Katy送蛋糕賀壽，令她感動落淚！抱恙的Katy表示拍《幕》劇相當辛苦經常喊，曾幾近患抑鬱症：「當時情緒好差，但又識到好多朋友，大家傾偈傾到凌晨五點。（生日願望想得獎？）係呀！想拎女配角，喺公司成日向同事拉票！（生日有冇男仔約？）零喎！唔緊要，我都要工作，寄望下年啦！」Katy昨日還到西環出席聖誕活動，透露將跟金剛出埠登台，不愁寂寞。

龔嘉欣獲大會驚喜賀壽，感動得眼濕濕。

左起：陳煒、謝芷倫、鄧佩儀、龔嘉欣、莊思敏、劉佩玥、阮兒 龔嘉欣幸有一班姊妹陪傾偈，走出抑鬱。

文：影視組