關之琳斟拍戲 晒半球儲粉絲

現年54歲的關之琳(之之)最近非常「惹火」,先與台灣富商陳泰銘爆離婚,又因行山問題而與劉嘉玲鬧意見,前晚更激罕地以透視晚裝上陣,胸前透視東西半球,性感誘人,她還暗示不排除復出拍戲,實行先以惹火身材證明自己風采依然。

「大美人」關之琳、男星游學修、薛芷倫、「恆生新抱」何倍倩、名媛林心兒、Moiselle太子爺陳栢熹、前亞視高層盛品儒與太太蔡一鳳等,前晚盛裝出席籌款晚宴,其中之之以性感打扮示人,身穿透視晚裝裙的她露出東西半球,非常養眼。對於一身性感打扮,之之說:「少少性感啦,接受到!」

斟拍內地真人騷

提到聖誕,她稱十分忙碌,既要做品牌宣傳、拍廣告及做運動,又洽談一個內地真人騷:「睇過啲真人騷覺得幾好玩,不過要出埠,所以未答應。(擔唔擔心體能應付唔到﹖)唔擔心,我平時有做運動。(有冇底線?)我好玩得,冇乜底線,最緊要唔好太危險。(有咩吸引你考慮做幕前?)因為工作多咗,個人活躍咗。」

之之又暗示有機會復出大銀幕,她續說:「好似我以前講唔想拍戲,但而家多咗空閒時間,咪做啲自己鍾意嘅嘢,依家都有啲劇本係為我而寫,不停傾緊,如果真係有一個可以令我心動嘅劇本,都會拍o架!(有咩角色同對手可以打動你?)角色唔重要,最重要係應付到,因為我成十幾年冇拍戲,如果有相熟朋友做對手係會定啲。」問到是否因為離婚而令心態變得開放?之之否認有改變,只因一旦開始工作就停不下來,而且人較以前活躍。記者指對粉絲來說肯定是好事,之之即笑着反問:「唔知我仲有冇粉絲?可能要再儲過啦!」

何倍倩助自閉童

至於身為三子女之母的何倍倩向來關注小朋友的社福工作,她趁聖誕前夕開辦工作坊,親自教授一班患有自閉症的小朋友畫畫,她說:「當日有啲小朋友係第一次畫畫,有啲家長話,小朋友平時坐唔定,估唔到畫畫坐足兩個鐘,連食嘢都唔肯走開,好多家長都好開心。」

文:名人組