Kelly睇400萬高訂「我訂粒鈕就得！」

潮媽陳慧琳（Kelly）前日出席時裝騷，曾到法國參加高級訂製服時裝騷的她，今次是首次不用坐長途機，在港便能欣賞到大師設計，故十分開心。騷上展出的服裝雍容華貴，不少更鑲滿金銀珠寶閃石，Kelly說：「靚到呢！靚到我一路睇，一路個心『嘩嘩』聲。」問到可有意訂番套？她笑說：「想呀，套套衫都好靚，但聽聞成300至400萬港幣，我訂粒鈕就得，邊有咁富貴呀！睇咗個騷當着咗啦。老實講，送畀我，我都唔知點收藏，不過假如佢哋借畀我演唱會着，我無任歡迎，最多請多兩個保安睇實件衫，好似人哋請保安護住啲珠寶咁。」