直播音樂會破百萬瀏覽 胡琳興奮似開100次紅館騷
有「爵士小天后」之稱的胡琳首次在廣州舉行音樂會，同步網上直播的在線人次比現場歌迷多達千倍，逾100萬人次收看，她笑言興奮感覺如開了100次紅館騷，更增強了明年首踏紅館開處女個唱的信心。
歌手胡琳日前在廣州首次舉行較大型的《一個夢 Jazz Them Up》音樂會，一千張門票火速被掃光，騷上她邀得廣州電台DJ梁宇翀合唱，並跟三位外國樂手合作唱英文歌。現場反應熱烈，而網上直播在線瀏覽人次更由最初的50多萬升至72萬，最高達逾102萬次。
胡琳昨日接受電話訪問時，對逾100萬在線瀏覽人次感意外，她以高八度的聲音說：「誇張啲講即等同開100次紅館演唱會，好在我事後先知咁多人上網睇，否則實緊張死我！」據知其唱片公司正計劃為她於明年底開紅館個唱，她直認恨首踏紅館舞台：「好恨呀！（開夠100次？）講笑啫，如果真係開100次就打破咗香港紀錄，我諗第一次開三場為目標啦！」
港迷上廣州捧場
胡琳坦言曾擔心音樂會反應差：「初時仲擔心廣州嘅Fans唔識我，怕冇乜人入場。」但原來大部分廣州Fans曾在網上被其歌曲吸引，故不少是專程到場館看她唱live，胡琳說：「工作人員講因為太多人而逼爆場，佢哋咁支持我，係好催淚嘅行為。（有香港Fans嚟咗喎？） 我仲擔心佢哋第二日使唔使返工、返學，但佢哋叫我專心唱歌，我無以為報，惟有唱好啲歌畀佢哋聽。」
文：音樂組