蕭正楠 翠如咀到腳軟扶牆

無綫台慶劇《幕後玩家》將進入結局周，高潮位可謂一浪接一浪，前晚播出的一集，輪到蕭正楠和黃翠如接力掀起話題，兩人飾演的角色顧成雙（黃翠如飾）與馮汐然（蕭正楠飾）婚姻破裂，成雙為了令雙方留下美好回憶，臨別秋波，甜蜜地跟馮汐然玩足一日，臨尾還「送糖水」，整個火辣鴛鴦花灑浴！

太熟超尷尬

黃翠如與蕭正楠在浴室赤條條濕身激咀，拍得相當到肉，加上兩人現實中是情侶，更加令人有無限遐想。該場戲播畢後，旋即成為網民熱話，有網友發現蕭正楠「企唔穩」要扶牆，搞笑指是否翠如太索，令他拍攝時腳仔軟失重心「企唔穩」？

箍實咀	黃翠如和蕭正楠各自爆喊，演技備受讚賞。	放大圖片

兩位當事人昨日接受電話訪問，蕭正楠指扶牆是劇情需要，原因是要控制角度，令翠如的打底衫不會穿崩！問到真情侶拍這類場口有否尷尬，翠如直言：「真係熟仲尷尬，因為現場有好多人，始終會有啲。（有冇NG？）咁又冇，但都有拍唔同嘅角度，不過因為要淋住水好凍，都好快拍完。」

喊戲有進步

前晚除了火辣戲，兩人的感情戲也做得非常好，劇中二人分別為結束一段仍有感情的婚姻而痛哭，演得相當入肉，不少網民更替蕭正楠所演的馮汐然「唔抵」，蕭正楠說：「汐然真係好慘，之後仲有好多虐心戲o架，好開心大家睇得咁投入，亦有好多人見到翠如演技上嘅進步，佢得到大家嘅認同，我都好戥佢開心！」

此外，蕭正楠昨日在中環出席珠寶店活動，被問到會否順便揀幾粒寶石送給女友？他笑謂：「你估提子咩！其實平時都有送嘅，但佢好男仔頭，好少戴首飾。最近《幕後玩家》入面佢戴緊嘅首飾都係我送嘅。」會否順手揀結婚戒指？他笑謂：「尋日我哋先（劇中）分開！其實我哋都好忙，呢排好少見，睇吓出年啦，慢慢唔急。」

文：影視組