謝安琪提提你入產房要除戒指！
蘇永康、張繼聰及其太太謝安琪（Kay）相當老友，Kay昨日接受電話訪問時透露最早得知喜訊。她表示與蘇太年紀相若，大家又差不多時間懷孕，兩家人可謂相當有緣，問到可有傳授佗B心得？她說：「天氣凍，大家會互相問候。我同阿公、阿聰會WhatsApp聯繫，咁阿公同太太係醒嗰堆嚟嘛，好識得養生，唔使講好多，我邊有咁叻教到人哋吖！」
Kay又分享生仔經驗，叮囑阿公陪太太入產房時一定要先除戒指：「我老公同阿公都好鍾意戴好大隻、好尖嗰種戒指，記得我生張瞻時，老公捉住我隻手叫我加油，佢啲戒指掯到我好痛！護士唔畀我大叫怕我嘥氣，我用眼神同老公表達，點知佢唔明，仲愈握愈大力，我覺得隻手嗰種痛，簡直有滿清十大酷刑嘅效果！」最後，Kay不忘送祝福：「成為最型、最潮嘅爸爸，等緊佢同囝囝襯晒衫咁行出嚟，實係好有型！」
