張衞健撩曾勵珍出山鬥戲

You Jump I Jump啊珍姐！（設計對白）
張衞健誠邀珍姐出山，齊齊拍劇過戲癮。

久未亮相無綫的張衞健（Dicky）前晚與好友許志安（安仔）、伍詠薇（伍姑娘）、梁漢文及蘇永康等錄影節目《我愛香港》，被問到有指相隔多年再返無綫拍劇？Dicky暗示有可能：「空穴來風未必無因！（有意拍？）我離開母校後從來冇否認過呢個可能性。」他自言目前與無綫並無合約，戲言回巢唯一要求是無綫高層曾勵珍「出山」拍劇：「你哋問咗珍姐先，等佢出山做演員，做一頭一尾集數都好！（呢個係你要求？）唯一要求！幫我問佢，佢OK我OK，佢唔OK嘅話我都考慮吓。」

伍詠薇恨拍劇

至於許志安則透露目前正籌備新碟製作，因唱片封套要於腹上畫畫，嚇得他立即節食兼操肌：「要操番呀！操唔番咪將個公仔畫大啲遮住個肚！」提到日前為歌手陳柏宇擔任個唱嘉賓，對方透露寫四頁紙信邀請他，安仔笑言首次收到男生執筆的「肉麻信」，相當尷尬：「第一次收男仔寫信！（寫咩畀你？）『好欣賞你』嗰啲肉麻嘢！佢好有誠意，雖然寫錯字，但佢願望係想同我合唱，所以應承佢。」

左起：梁漢文、蘇永康、許志安、張衞健 許志安坦言想Big Four去旅行，可惜其他成員冇期！	伍詠薇向無綫送秋波，希望明年拍古裝劇。	擔任主持的黃心穎將自拍照着上身。

目前自由身的伍詠薇有一段時間未有返無綫拍節目，難怪開到口恨拍劇：「希望明年無綫有適合嘅劇本，我好樂意去聽吓古仔，啱拍就拍，唔啱就出去搵吓外快。」她自言鍾意拍古裝，又稱不怕辛苦。

文：影視組