「人造衞星」監控情人?前世前世前前世!

有錢,係咪真係大晒呢?唔好話我Nuts哥拋書包,好多富豪都講過:「視富貴如浮雲。」幾有錢都好,識得取諸社會、用於社會,呢啲咪係真富貴囉!呢種慷慨寬容嘅胸襟,唔係個個富豪做到!近日劉鑾雄翻箱倒櫳噴晒口水話使咗廿億喺呂麗君身上,炫富炫到盲公陳都幾乎開眼,仲拎晒所有證據出嚟!其實如果愛一個人,買嘢送嘢畀對方,都係心甘情願先會咁做啫!乜送禮係被人逼o架咩?送一次、兩次就話被迫要做老襯啫!送咗畀咗超過廿億喎!你就真係當我哋老襯喇!

送完畀完仲要周街唱,唔好話我長氣,我又要講呢句:「真係人唔厭狗都吠!」大劉尋日話佢九千年前已經諗到呂麗君想做啲乜,嘩!九千年前?Nuts哥嚇咗一跳,即係前世前前世同N個前前前世喎!世界之大無奇不有,乜真係有鄭嘉穎個不死人角色「刑活著」o架?好笑到一個點係,大劉話識呂麗君第一日開始已經知佢份人係點,所以搵人做「人造衞星」(目及)住佢好耐,仲話呂麗君其實好蠢好蠢好蠢o架!

億億聲買袋?大把人瞓橋底

好笑好笑好好笑就真啦!Nuts哥真係笑到淚水標,拍拖嘅嘢,一係兩情相悅手拖手行落去,一係今朝有酒今朝醉,最緊要大家清楚個遊戲規則係點。如果你第一日識個女人,一眼就睇穿對方又蠢、面皮厚過恐龍皮兼動作多多嘅話,點解仲繼續同呢個女人一齊?仲要現金手袋珠寶大屋乜都送兼生埋對仔女喎!呢個係咩玩法呢?即係你講晒啦!仲話搵人做「人造衞星」行到邊(目及)到邊,真係笑大人個口!玩人肉監控,國家領袖咩?

呢個社會已經夠多怨氣,不知有幾多人仲活喺赤貧線下,街頭街尾都會見到有公公婆婆,彎住腰趷趷吓去執紙皮。天寒地凍,有唔少無家人士喺天橋底下凍到騰騰震,好多細路哥屈喺幾十呎劏房,食玩瞓都係喺下格床。

施比受更有福,不如做多啲善事好過啦!現時四人家庭平均每月綜援金額大約係1.4萬元,大劉買個Hermès手袋閒閒哋都40萬,即係買少個手袋,就可以幫助一個四人家庭大約兩年零三個月嘅生活費,咁樣仲有意義啦!仲有呀,既然搵人做「人造衞星」嘅話,不如再大志啲,攞啲錢出嚟做真正嘅人造衞星,幫手探索吓其他星球,睇吓有冇外星生物係咪面皮厚過恐龍皮好過啦!